TEMPO DE NADAL...

Hoxe, venres 1 de decembro, incorporamos unha rutina á asemblea matinal aproveitando a chegada do Nadal... o “Calendario de Adviento”!

Deste xeito, pechamos a semana da mellor das maneiras posibles, pois logo da asemblea matinal que, como cada venres corre a cargo da profe Verónica, descubrimos unha das novidades que suscitará variadas conversas sobre o Nadal.

Así pois, un dos primeiros faladoiros arredor do Nadal, foi a decoración que axiña cadaquén puxo na súa casa: árbores, bonecos de neve, estrelas “brillantes”..., pero sobre todo luces, moooitas moitas luces: brancas, azuis, de “colorines”... estupendo!

Neste senso, durante o que resta de trimestre, ademais de poñer o punto e final a actividades varias que servirán de colofón a este 1º trimestre, descubriremos, identificaremos e valoraremos o Nadal como feito relevante próximo á nosa vida cotiá. Para isto, partiremos de elementos motivadores como cancións, contos, diferentes personaxes de tradición popular (Reis Magos, Papá Noel, Apalpador, achegándonos a outros menos significativos que traballaremos especialmente en 4-5 anos: Olentzero, Tió de Nadal ou a Bruxa Befana de Italia), respectando e valorando, en todo caso, a diversidade como elemento positivo e enriquecedor da nosa aula e da persoa humana.

Porén, o “Calendario de Adviento” relacionarémolo coa inminente chegada das vacacións de Nadal nas que por fin, levaremos para a casa todos os traballos realizados durante o trimestre... case listos e preparados!

Cada mañá, o súper-encargado/a, logo de escribir a data e constatala nos paneis dispostos para tal fin, abre a porta do día no que nos atopamos para descubrir que debuxo se agocha na chocolatina... mmm, deliciosa!...

Xa o luns, aproveitamos tanta novidade para incorporar sendos gorros de Papá Noel a modo de elemento distintivo non só para o súper-encargado, senón tamén para o “axudante” elixido ao azar que, -con gorro de Papá Noel incorporado-, colaborará no desenvolvemento desta rutina que tanta expectación levantou.

Sen dúbida, a introdución desta rutina, proporciona un cúmulo de experiencias que non deixamos escapar, realizando actividades de lóxica-matemática como contar, iniciación á suma e á resta, identificación e trazo de números…

No noso “Calendario de Adviento”, aparece Papá Noel. Como non podía ser doutro xeito, tamén aparecen os seus compañeiros fieis: os renos.

Sabiades como se chama o reno que sempre sempre vai de primeiro?... Chámase Rodolfo, un reno do que o resto se ría ata o momento en que Papá Noel o converte no seu principal axudante... nooon, chámase Rudolph!!

Agora si que si, comezamos unhas semanas cargadas de sorpresas e de ilusións compartidas: rematamos o noso primeiro trimestre, celebraremos os derradeiros aniversarios -BELTRÁN, NABIA, VALERIA, ALICIA e SIRA..., xa vos queda menos!-, a chegada de Papá Noel e das SS.MM. os Reis Magos de Oriente,... e un senfín de cousas máis coas que dalgún modo, os maiores voltan ser de novo un chisquiño máis nenos...

E todo isto levarémolo moito mellor con toneladas de purpurina concentrada de todas as cores... canto brillo!, como nos gusta!

Un saúdo e non esquezades que... o noso blogue se alimentará dos vosos comentarios!