Bienvenido

AMBIENTES DE APRENDIZAXE.

viernes, 29 de noviembre de 2019

Esta semana, fixemos unha nova incursión á Facultade de Maxisterio para participar nas actividades dispostas en Ambientes de Aprendizaxe.
Os Ambientes de Aprendizaxe son os diversos escenarios que configuran o entorno vital para a construción do coñecemento e aprendizaxe, converténdose nun modo actual de reestruturar o espazo en Educación Infantil. A teoría dinos que non se trata de obradoiros, nin tampouco de rincóns, zonas e/ou espazos diferenciados, senón de algo máis grande; unha aula ou o corredor poderían ser un Ambiente de Aprendizaxe... soa xenial!
Nesta ocasión, coñecedores das posibilidades que nos ofrece o propio corpo, desenvolvemos distintas actividades cuxo eixo vertebrador foron as 5 modalidades sensoriais: os seus usos e funcións.
Organizados en pequeno-grupo segundo a cor da peza escollida en cada caso, acudimos aos espazos organizados nos corredores da Facultade para desenvolver as actividades alí establecidas.
Sen apenas decatarnos, aos poucos, participamos en 5 experiencias que permitiron iniciarnos no método científico con actividades para cada órgano dos sentidos que puxeron a proba as nosas habilidades sensoriais... comezamos!
Para desenvolver o sentido do TACTO, cadaquén modelou en pasta de sal a parte que conforma o corpo humano asignada, diferenciando cabeza, tronco e extremidades... esta plasti si que mola!


Porén, no sentido do OÍDO, escoitamos con atención e tratamos de averiguar os sons producidos por distintos obxectos cotiás; para iso, había que estar en silencio e erguer a man para responder ao xeito... fantástico!


Xa no sentido do GUSTO, cos ollos pechados e sen ver nada, degustamos diferentes produtos respectando posibles alerxias alimentarias: tomate, patacas fritidas, limón... mmm, mesmo unha saborosa regalicia!


No espazo reservado ao OLFACTO, ulimos os arrecendos que saían duns botes con produtos ben olorosos no seu interior, asociando en cada caso a tarxeta identificativa co frasco correspondente: cacao, cebola, café, canela... ata colonia fresquiña... marabilloso!


E para o sentido da VISTA?... Xogamos coa mesa de luz, co retroproxector e coa lanterna, dando luces e sombras a espazos baleiros, manipulando xelatina coma se de area se tratase: vimos como cambiaba de cor, comprobamos as súas propiedades, densidade... que divertido!




Sen lugar a dúbidas, todas estas experiencias lúdico-exploratorias, convertéronse en fantásticas situacións nas que grazas á observación, exploración e experimentación, construímos activamente a nosa aprendizaxe... queremos repetir!
Un saúdo e non esquezades que... o noso blogue se alimentará dos vosos comentarios!

LETRILANDIA: O PAÍS DAS LETRAS. (II)

viernes, 22 de noviembre de 2019

3, 2, 1... Siii, esta semana despegamos nada máis e nada menos que a un país que existiu hai moitísimos anos cando había xigantes e magos, trasnos e fadas, na época na que os animais falaban: Letrilandia, o País das Letras.
Chegou o momento de familiarizarnos coa identificación, escrita e lectura da letra enlazada minúscula, desenvolvendo, desde esta mesma semana, múltiples e variadas actividades impresas coas que de seguro esta nova aprendizaxe resultará máis doada do que pode semellar... perfecto!
Da man do Señor Estudoso, ese señor baixiño e simpático, cuberto cun sombreiro e cunhas lentes, descubrimos un lugar rodeado por verdes campos salpicados de alegres flores de cores nos que hai uns pequenos ríos saltaríns que proporcionan auga fresca para beber e un lugar onde xogar e refrescarse.


O Señor Estudoso tiña moitas ganas de aprender e descobrir cousas novas; por iso sempre leva un lapis e un caderno na man onde anotar todas as marabillas que ía descubrindo ao longo das súas viaxes.
Cando paseou polas rúas de Letrilandia, do País das Letras, o Señor Estudoso observou os costumes dos seus habitantes. Abraiárono as formas que tiñan os seus corpos, así como a súa forma de comunicárense. Todos eran distintos e falaban diferente.


Pensou que se debuxaba os seus corpos e aprendía o seu xeito de falar, podería escribir todos os contos e marabillas que aprendía nas súas viaxes.
Situado á esquerda, atópase o País dos Xigantes, onde o mago Catapún e os demais habitantes vixían sempre para amolar as letras. Por iso, estas camiñan sempre de esquerda a dereita.


Así pois, mediante este archi-coñecido método de lectura, semanalmente descobriremos un a un os personaxes deste fantástico lugar, onde a través das súas historias, coidamos gañar confianza e seguridade nas nosas posibilidades cara a aprendizaxe da lecto-escritura.




Neste senso, a partir da primeira semana de decembro, engadiremos unha nova rutina á nosa parrilla de clase e os venres levaremos para a casa unicamente durante a fin de semana a cartilla de lectura nº1 de Letrilandia na que se presenta gradualmente a lectura en letra enlazada minúscula. O que se pretende con este material é que na casa continuemos de xeito máis individual a labor referida á lecto-escritura iniciada na escola. Para iso, hai que lembrar que a cartilla de lectura deberá vir cada luns coa carpeta e así poder engadir durante a semana unha nova letra... soa xenial!


Familias!… abrochade ben os cinturóns, estades convidadas a coñecer as aventuras e desventuras destes personaxes, e lembrade... hai que camiñar sempre de esquerda a dereita!


Un saúdo e non esquezades que... o noso blogue se alimentará dos vosos comentarios!

TRABALLO POR PROXECTOS.

viernes, 15 de noviembre de 2019

Nos últimos días, unha vez máis, participamos nas actividades desenvoltas na aula de Educación Artística da Facultade de Maxisterio.
Sabedores de que a linguaxe artística xoga un papel indiscutible en Educación Infantil, nesta ocasión participamos en 6 mini-proxectos que nos achegaron a elementos e aspectos da nosa vida cotiá.
Nesta ocasión, organizados en pequeno-grupo, o alumnado de Maxisterio distribuínos en cada mini-proxecto: a cidade e os medios de transporte, o ciclo vital, os dinosauros, as estrelas, as sombras e os cogomelos.
Na CIDADE E MEDIOS DE TRANSPORTE redescubrimos os medios físicos de desprazamento dos medios de transporte cotiá, valorando a necesidade dun uso moderado destes para evitar a contaminación ambiental. Coches e camións, avións e helicópteros..., mesmo un submarino co que descubrir os tesouros do fondo do mar... parabéns!




No mini-proxecto do CICLO VITAL, aprendemos que animais, plantas e persoas pasan por diferentes etapas; analizamos unha mazá verde e outra menos apetitosa como consecuencia do paso do tempo, tamén as árbores en cada estación e as persoas en cadansúa etapa vital: neno-adulto-ancián.


Na quenda dos DINOSAUROS debuxamos o noso dinosauro preferido dando renda solta á nosa imaxinación, incluso tivemos tempo para converternos en auténticos exploradores escavando ósos que semellaban de auténticos dinosauros... impresionante!


Por outra banda, grazas ás ESTRELAS, lembramos elementos do espazo traballados o curso pasado: planetas, constelacións, cometas... recreando con témpera de cores e pinceis de diferentes grosores o noso Sistema Solar... a Osa Maior quedou xenial!


Co traballo das SOMBRAS, descentramos a idea de esquemas corporais con cores e partes diferenciadas, pois as sombras son negras, grises, escuras... nas que non se diferencian ollos, nariz, boca... Este mini-proxecto achegounos ao uso do retroproxector de luz, xogando coas siluetas creadas, xerando sombras pequenas, medianas, grandes...



O derradeiro mini-proxecto trataba sobre os COGOMELOS, un eixo motivador que permitiu achegarnos a un dos elementos representativos do outono traballado na clase. Agora xa, identificamos as partes do cogomelo, incidindo na necesidade de coidar que cogomelos son comestibles e que cogomelos son velenosos... moito ollo!


Sen lugar a dúbidas, esta incursión na Aula de Educación Artística permitiu crear un ambiente propicio para a estimulación da imaxinación e creatividade, na que desenvolvemos o pensamento racional e a nosa capacidade de análise baseándonos no uso sistemático da razón. Queremos repetir!...

- A CIDADE E MEDIOS DE TRANSPORTE -
- O CICLO VITAL -
- OS DINOSAUROS -
- AS ESTRELAS - 
- AS SOMBRAS -
- OS COGOMELOS -
Un saúdo e non esquezades que... o noso blogue se alimentará dos vosos comentarios!