Bienvenido

SEMANA DO LIBRO 2018.

viernes, 27 de abril de 2018

Esta semana, participamos activamente no desenvolvemento de múltiples propostas de traballo relacionadas coa Semana do Libro 2018.
Como non podía ser doutro xeito, nunha aula como a nosa na que a lecto-escritura convértese nunha aprendizaxe máis, esta actividade conmemorativa non pasou desapercibida e realizamos diferentes actividades cuxo eixo motivador, unha vez máis, foron os relatos, contos e a literatura infantil.
Comezamos reunidos na zona da asemblea conversando sobre os nosos contos preferidos, dende os máis clásicos como Caperucita Roja, Los 3 cerditos ou El patito feo, ata os máis actuais como: Peppa Pig, Mickey Mouse, Elsa e Anna de Frozen...
Esta conversa, na que a asemblea se converteu nunha estratexia ideal como lanzadeira de ideas previas, serviu para identificar e valorar a literatura infantil como elemento estimulador da imaxinación e creatividade.


Porén, e sabedores das aportacións dos contos no noso proceso de desenvolvemento integral, esta semana a sesión de contacontos cobrou, se cabe, cun protagonismo extra. Así, a partir dos contos aportados case diariamente por parte do grupo-clase, xuntos creamos un clima que resulta tan grato e estimulador para a adquisición de técnicas relacionadas co proceso de lecto-escritura, ilusionámonos cun ambiente propicio á lectura e contaxiámonos do entusiasmo dos libros como portadores dun mundo máxico e marabilloso.


Asemade, aproveitamos para descubrir que centro de interese nos depara o libro nº6 que servirá para despedir a MUNA e recibir a MUNELA, a mascota de 4 anos... que boa nova!
Pero... sabedes por que se celebra o “Día do Libro” cada 23 de abril?...
Para celebrar o “Día do Libro” escolleuse o 23 de abril por coincidir co falecemento de grandes escritores universais tales como: Miguel de Cervantes, Garcilaso de la Vega ou o mesmísimo William Shakespeare.
Xa no ano 1995 a UNESCO promulgou o 23 de abril como “Día Internacional do Libro”, aínda que no caso de España xa se viña celebrando dende o ano 1930.
Neste senso, realizamos un primeiro achegamento a unha das obras máis destacadas da literatura española: El Quijote de Miguel de Cervantes.


Deste xeito, os días véspera a esta celebración, o corredor converteuse no escenario improvisado dos personaxes máis representativos dunha das principais obras da literatura universal: Don Quijote de la Mancha, Sancho Panza, Dulcinea del Toboso, Rocinante, Rucio...
Sen perder detalle, aprendemos os seus nomes, identificamos algúns dos seus atributos -a lanza de Don Quijote foi o que máis nos chamou a atención-,  cores, formas, tamaños e proporcións nun museo improvisado onde está prohibido tocar estas obras de arte a gran escala... so se pode mirar!


Xa na clase, deixamos constancia de todas estas aprendizaxes recreando unha das escenas máis emblemáticas de Don Quijote: a obsesión cos muíños de vento que, lonxe de ser xigantes, son construcións de pedra, cemento e ladrillo. Prestamos atención á cor de cada espazo, creando por primeira vez con cera plástica a cor gris para a armadura de Don Quijote...


E para rematar, que mellor que mellor agasallo que un marcapáxinas co que marcar nos nosos contos a páxina na que quedamos... fantástico!


Un saúdo acompañados de lectura e non esquezades que... o noso blogue se alimentará dos vosos comentarios!

BENVIDA PRIMAVERA!

viernes, 20 de abril de 2018

Sen lugar a dúbidas, as modificacións que se producen coa chegada dunha nova estación non pasan desapercibidas na nosa aula, e como non podía ser doutro xeito, suscitaron diversas actividades que nos serviron para observar de primeira man elementos propios da primavera.
Siii, por fin a primavera xa está aquí!, e con ela os días serán máis longos e o sol debera quentar con máis intensidade...
Para comezar, reunidos na zona da asemblea levamos a cabo un torbeliño de ideas no que tiñamos que dicir obxectos, elementos, situacións... relacionadas coa primavera: bolboreta, árbore, sol, abella, herba, paxaros, arco da vella, caracois e... flores, moooitas flores.
Consecuentemente, e xa que as flores convértense na proba irrefutable da chegada da primavera, comezamos o mural que pronto decorará o corredor.


Había flores colorín coloradas: vermellas, azuis, rosas, laranxas..., así que en primeiro lugar, de xeito organizado, eliximos a nosa flor favorita para ter un extra de motivación... restaba traballo que picar... paciencia...


Tamén, como outro dos elementos máis representativos da primavera, decoramos unha árbore: pintamos o tronco de cor marrón e para a parte máis alta -a copa-, desenvolvemos un improvisado obradoiro de expresión plástica no que creamos a cor verde engadindo unhas cantas pingas de témpera de cor amarela e outras cantas pingas de cor azul, botando máis ou menos dunha ou outra segundo a intensidade da cor desexada... abraiante!


Con estas e outras actividades concluímos que na primavera saen as flores, as follas das árbores son de cor verde clara, escura..., xa non vestimos tan abrigados como no inverno...etc
Por outra banda, todas estas aprendizaxes víronse o luns rediversificadas coa tan agardada visita á horta escolar, logo de que en anteriores ocasións por mor do mal tempo resultase imposible.


Neste senso, como vén sendo decote dende o 2º trimestre, esta semana tivemos a visita da “profe da horta” que, por si quedara algunha dúbida, concienciounos da necesidade de coidar as plantas da contorna, incidindo no traballo transversal da Educación Ambiental.
Organizados en pequeno grupo plantamos unha cebola babie. Para iso, mentres uns sachaban co apeiro de labranza aportado para a ocasión -o sacho-, outros fixeron cun pau un buraco na terra, para por último, sementar a cebola e soterrala con coidado... que situación tan fantástica!... sen decatarnos recreamos algunha das funcións propias do granxeiro e granxeira que MUNA, PABLO e BERTA visitaron na unidade 5... xenial! 




Esta actividade, serviunos para lembrar algunhas necesidades básicas das plantas: luz, auga e terra, entre outras, concienciándonos da importancia de coidar e conservar o medio natural; un medio natural onde apareceron varias miñocas de terra que estupefactos aloumiñamos con coidado para non asustalas... que momento!


Nooon!... Non pensedes que a primavera só trae consigo traballo, é que deixamos o mellor para o final... pois ademais de todo isto, este tempo trae a posibilidade de gozar de novo do patio... que boa nova!... Porén, aproveitando os raios de sol de toda a semana e ataviados coas gorras para protexernos do sol: corremos, saltamos, trepamos, rodamos..., e suamos, canto suamos!...


Agora si que si... BENVIDA PRIMAVERA!...
Un saúdo e non esquezades que... o noso blogue se alimentará dos vosos comentarios!

XOGO SIMBÓLICO E XOGO DRAMÁTICO.

viernes, 13 de abril de 2018

Sabedores das posibilidades que nos ofrece a expresión corporal como forma de comunicación e representación, estes días rediversificamos e reconceptualizamos -se cabe aínda máis-, o rincón de xogo simbólico; espazo onde se produxo a recente incorporación de BELINDA, DAVID MANUEL & ROSANA...
Nesta ocasión, non se tratou da presentación de novos babies, senón de algo que agochaban os maletíns de cor vermella e rosa sitos nun dos estantes do espazo do rincón de xogo simbólico: o kit de médicos e o set de perruquería... que boa nova!
Así pois, e como recompensa ao traballo desenvolto durante estas semanas, descubrimos e identificamos algúns dos accesorios propios destes maletíns: o peite, secador e espello de man do SALÓN DE BELLEZA e o termómetro, fonendoscopio e mesmo xiringas do kit de MÉDICO.


Sen lugar a dúbidas, tratábanse de materiais de sobra coñecidos, por iso axiña prestamos atención a como debiamos empregalos para que non se estraguen e así cumprir a finalidade establecida.
Porén, e como consecuencia inmediata, co emprego sistemático destas novas adquisicións, achegámonos ao coñecemento e valoración positiva de oficios e profesións do contorno próximo, centro de interese do inminente caderniño nº6 de MUNA.
Creamos e recreamos o SALÓN DE BELLEZA, peiteando a todo aquel que se deixe, tamén a Suso Caruso e a Mica, agardamos a nosa quenda sen desesperar, mirámonos no espello de man...


No canto do kit de MÉDICOS, convertémonos en expertos no uso do fonendoscopio, auscultándonos a nós mesmos, simulando a respiración fonda que nos indica o médico na súa consulta... a recreación deste momento na asemblea por parte de IAGO foi real como a vida mesma...


Neste senso destacar, que nalgúns casos séguenos custando aceptar ter que esperar a nosa quenda e respectar as regras dos xogos, compartir cos demais e amosarnos conciliadores nos conflitos que xorden no xogo, pedir perdón, aceptar os erros..., coidamos acadalo, de momento... paciencia...
Ao tempo, con esta e outras actividades lúdicas que iremos engadindo á nosa parrilla de clase ligadas á expresión corporal, avanzamos no control e dominio de sensacións, sentimentos e emocións adoptando o rol propio de personaxes próximos á nosa realidade, propiciando experiencias corporais que favorezan posturas e interaccións co espazo (obxectos, adultos e grupo de iguais), recoñecendo as posibilidades de movemento do corpo, adquirindo cotas maiores de autonomía persoal e social, favorecendo a construción da propia identidade...
Agora xa, aproveitando que din que nos próximos días comeza o tempo propio destas datas, simultaneamente aos traballos de MUNA, observaremos e exploraremos algúns dos elementos representativos da primavera, participando activamente na elaboración do mural do noso corredor... benvida primavera?? 


Un saúdo e non esquezades que... o noso blogue se alimentará dos vosos comentarios!