Bienvenido

A.D.R. CASTELAO: ESCOLA DE SUSTOS.

jueves, 29 de octubre de 2015

Hoxe puxemos o colofón final a uns días monstruosamente divertidos cheos de cabazas terroríficas, pantasmas, morcegos e moitas, moooitas historias de “medo”.
Comezamos a motivación desta celebración mediante un torbeliño de ideas no que destacamos elementos representativos desta data: pantasma, bruxa, esquelete, vampiro, castelo encantado, momia e... FRANKENSTEIN!   
Pero... que é ou quen é FRANKENSTEIN?... Pois FRANKENSTEIN é un gran home de cara verde metade humano, metade robot que este curso se converteu no personaxe fantástico estrela das nosas conversas, debuxos, xogos... Si, si, ata MIGUEL trouxo un boneco deste personaxe co que disfrutar no rincón de piratas,... fantástica idea!
Así pois, a partir das asembleas matinais aprendemos a identificar e a respectar os medos propios e alleos dándolle a naturalidade propia, pois... quen non ten algún medo?...


Tranquilos, non hai de que asustarse!... bruxas, pantasmas, vampiros, momias e demais personaxes... so existen nos contos e/ou nas pelis!
Tamén durante estes días recreamos a festa de aniversario de Enrique coa lectura dos contos: El cumpleaños de Enrique (Edit. Edelvives) e Sonidos de Miedo (Edit. SM) -non era o aniversario de Enrique, senón o aniversario de 4 anos de SANTIAGO-, coloreamos pantasmas facendo series de dúas cores, debuxamos personaxes arrepiantes en castelos encantados, descubrimos a anatomía dunha bruxa a partir da escrita significativa de palabras: SOMBREIRO, GATO, VASOIRA...









Asemade, co gallo desta celebración, o colexio mudou a ambientación cotiá. 


Neste senso, a nosa porta mudou o seu aspecto... quen se atreve entrar?...


Ah!, e o noso corcho do corredor converteuse na morada duns orixinais vampiros rodeados de escalofriantes imaxes fantasmagóricas... uuuh!


Por outra banda, e por se todo isto fose pouco, dende o centro solicitouse a colaboración das nosas familias na decoración das cabazas: dende bruxas, vampiros e bebés, ata personaxes dos nosos debuxos animados favoritos, unha vez máis… mil millóns de grazas, familias!! E a pesar de que este curso o mal tempo impedise converter o centro nunha escola encantada coas cabazas expostas nas ventás, entre todos e todas conseguimos que os corredores si desen medo, moooito meeedo!


Uuuh!!... menudo susto se levou a teacher Karina... it was very fun, thank you teacher!


Xa para rematar, hoxe xoves despois do recreo puxemos o disfraz de gato elaborado para a ocasión e dirixímonos con certa desconfianza cara o pabillón dos maiores... que tanto barullo?...


Máis tranquilos aínda que sen perder de vista ao profe, disfrutamos da escolma de cancións seleccionadas para o acto e, a pesar de traballar a xestión positiva dos nosos medos durante estes días... quen non ía ter medo as carautas que levaban algúns dos maiores?... uf, que mal rato!


Truco ou trato?... No noso caso foi doado, e levamos para a casa un delicioso truco en forma de gato... mmm, saboroso final!


Un saúdo e non esquezades que... o noso blogue se alimentará dos vosos comentarios!

ENCERADO DIXITAL INTERACTIVO.

viernes, 23 de octubre de 2015

A nosa aula non podía permanecer á marxe das Tecnoloxías da Información e da Comunicación (TICs), por iso, este curso incorporamos ás nosas actividades cotiás a interacción co Encerado Dixital Interactivo (EDI), a partir dos recursos educativos que nos ofrecen as ferramentas web 2.0: software comercializado, conexión a recursos web na Internet, repositorio de contidos e actividades do Espazo Abalar da Consellería…

Dende o momento do nacemento convivimos  con todo tipo de equipos tecnolóxicos: smartphones, tablets, PCs…, polo tanto, resulta evidente que as actividades que desenvolvemos na escola converteranse nunha realidade, se cabe máis rica e froitífera, se no proceso de ensinanza-aprendizaxe se empregan medios tecnolóxicos de información e de comunicación.
Deste xeito, o curso pasado, cando eramos os máis pequerrechos e pequerrechas do colexio, mergullarámonos de xeito tímido no uso e manexo das múltiples posiblidades que nos ofrece o Encerado Dixital Interactivo disposto na zona da asemblea. Así pois, empregamos este recurso para adentrarnos no centro de interese que NUBA nos presentaba en cada historia axudándonos a comprender cada vez máis e mellor o noso pequeno-gran mundo... estabamos como no cine!


Ademais, xa en 3 anos participamos en varias actividades a través do emprego case sistemático do Encerado Dixital Interactivo mediante unhas doadas tarefas cuxa finalidade era controlar o punteiro do rato... que recordos!


Agora xa en 4 anos, empregaremos ao longo do curso e segundo as necesidades de cada momento, as posibilidades que nos ofrece o Encerado Dixital Interactivo como un excelente recurso didáctico para aprender e para xogar. Coa introdución do manexo deste medio traballaranse, reforzaranse e ampliaranse algúns dos contidos propios da Educación Infantil: lóxica-matemática, lecto-escritura, grafomotricidade, as cores, nocións espaciais, temporais, topolóxicas, musicais… ademais da consabida adquisición doutras capacidades, competencias e habilidades máis específicas como aprender a mover de maneira precisa o rato, sinalar, facer clic, arrastrar…



Estas e outras actividades, axudarán a contribuir ao desenvolvemento da Competencia Básica establecida pola UNESCO: Tratamento da Información e Competencia Dixital, ao tempo que acadamos os obxectivos incluídos no “Plan de Integración das TIC´s” do centro... que interesante!



Parece doado, si, pero se non queremos “perder a partida”, hai que estar cos ollos ben abertos para non perder detalle...que pantalla tan grande!



Cada día agardamos con ilusión desenvolver actividades a través do EDI, agora temos que propoñernos ter un chisquiño máis de paciencia para agardar sen desesperarse demasiado a nosa quenda… moooita paciencia e atención!
Un saúdo e non esquezades que... o noso blogue se alimentará dos vosos comentarios!

COMA SÚPER-MAIORES!...

viernes, 16 de octubre de 2015

Hoxe levamos a cabo o primeiro préstamo semanal de biblioteca, todo un préstamo en condicións: sesión de contacontos e nomeamento da contacontos da vindeira semana, visionado das nosas primeiras fichas de lectura: que contos gustaron máis, que contos gustaron menos... Todo isto nun dos lugares do cole no que nos debemos portar mellor que nunca: na biblioteca... case nada!

Así pois, a actividade desta semana serviunos para repasar as normas de obrigado cumprimento cada vez que entramos na biblioteca do cole facendo fincapé en que neste espazo non se pode falar,... alomenos non en voz alta!
Sabedes que hai que facer se vemos un libro estragado?... Pois deixalo na “Cruz Vermella” para que os profes o arranxen e non se rompa máis.
Sabedes que na biblioteca temos unha Xouba?... Xouba Castelao é a mascota da biblioteca e a encargada de lembrarnos as normas a través de paneis e pictogramas.


Pódese comer/beber na biblioteca?... Nooon, iso tamén está prohibido!...
Logo deste breve recordatorio, unha a unha descubrimos as fichas de lectura elaboradas por cada compañeiro e compañeira... que traballos!
Había fichas de lectura elaboradísimas ás que non lles faltaba detalle, fichas de lectura cuns Caillous e cunhas Peppas xeniais, repletas de cores e de toneladas concentradas de enxeño... parabéns! Ah familias!, non esquezades que xa somos o suficientemente maiores para levar a cabo a actividade completa pola nosa conta... paciencia!


Chamounos a atención que algún de nós decidiu colorear a cara triste -pictograma que indica que a historia do conto non resultou todo o interesante que coidabamos-... non pasa nada!... e agardamos que as vindeiras semanas o conto sexa máis do seu agrado... seguro que si! Neste senso, sempre interesantes resultan as actividades que levamos a cabo no rincón da biblioteca establecido nun dos espazos máis luminosos da nosa aula... agora os contos son novos... que imaxes máis espectaculares!


Como colofón final, e antes de repartir os contos da semana, tal e como vos comentaramos NICOLÁS, converteuse no primeiro contacontos do curso.
Peppa va a la piscina (Edit. Beascoa), foi o conto elexido, realizando unha “lectura” case case profesional, nun principio timidamente por iso de estar de protagonista absoluto de fronte ao grupo-clase. Malia a isto, cada vez foi gañando máis confianza e o seu ton de voz máis alto fixo que apenas perdesemos detalle dun conto que xa coñecemos de memoria... fantástico!


Agora xa, a vindeira semana tocaralle o turno a XIMENA que rapidamente elixiu un novo conto da colección de Peppa Pig: Peppa va al parque de atracciones (Edit. Beascoa)... estará fantástica seguro!


E agora que?... Pois ao tempo que seguimos descubrindo algunha peculiaridade de Nova Celandia grazas á viaxe de MOLI, mergullarémonos nunha das datas cunha especial significatividade no cole: o Samaín-Halloween!; un acontecemento que propiciará un senfín de actividades de aprendizaxe... monstruosamente interesantes!


Un saúdo e non esquezades que... o noso blogue se alimentará dos vosos comentarios!

LEMOS CON CAILLOU E PEPPA...

viernes, 9 de octubre de 2015

A partir desta semana, incorporamos unha nova actividade á nosa parrilla de clase, a rutina do préstamo semanal de biblioteca.
Esta nova rutina, servirá para que nos sigamos familiarizando coa dinámica da biblioteca, para que nos ilusionemos cun ambiente propicio á lectura no ámbito escolar e familiar e para que nos contaxiemos do entusiasmo dos libros como portadores dun mundo máxico e marabilloso.
Ao longo de cada semana, coa axuda das nosas familias traballaremos o conto para comprender o seu argumento, xa que cada venres, nomearemos un contacontos seguindo a orde da casiña do panel de rutinas que “lerá” o conto ao resto do grupo a través da intepretación das súas imaxes e ilustracións.


Entre as moitíiisimas actividades que se poden levar a cabo a partir do conto están: as actividades de comentar que axudan a asimilar o conto e realizar unha trasposión dos feitos ás experiencias vividas, actividades de xogo dramático, representando os roles dos protagonistas, actividades de creación de historias: a ensalada de fábulas ou o binomio fantástico de Gianni Rodari...
O contacontos semanal, terá o privilexio de elexir o conto co que quere deleitarnos na súa sesión de contacontos, o resto levará o conto asignado ao azar... non pasa nada!, todos teñen algo de interesante, divertido ou curioso.
Moi entusiasmados coa actividade do préstamo, o venres fomos á biblioteca non sen antes lembrar as normas que debemos seguir cada vez que acudimos ao pabillón dos maiores... canto nos gusta correr!
Xa na biblioteca, lembramos as súas normas, usos e funcións, sen perder de vista tooodos os libros, contos, álbumes, DVD´s... que alí se atopan.


Logo, descubrimos os contos que levaremos durante alomenos este primeiro trimestre: as coleccións de Caillou e Peppa Pig... fantástica sorpresa!
CAILLOU é un neno de 4 anos que todo o que atopa ao seu arredor convírtese na excusa perfecta para unha nova aventura, aprender cousas novas e así descubrir o seu pequeno-gran mundo... que interesante!


PEPPA PIG é unha divertida porquiña que xunto coa súa familia e cos seus amigos, viviremos mil e unha aventura: a primeira vez no dentista, na piscina, no parque de atraccións... historias que contribuirán á transmisión de valores tales como a solidariedade, o respecto, a igualdade, a colaboración...


A medida que avance o curso, estes contos irémolos cambiando por outros máis de maiores; e serán máis de maiores porque coa axuda das nosas familias poderemos silabealos, lelos como auténticos súper-maiores, pero para iso aínda temos moooito que traballar, así que... paciencia! Ler ten que ser un tempo de pracer, de diversión e de disfrute... non o esquezades, familias!



Este curso ademais, continuaremos coa realización das fichas de lectura. Nesta tarefa, como non podía ser doutro xeito, nós deberemos ser os protagonistas absolutos da actividade, encargados de cubrir os datos solicitados e de realizar o debuxo do conto... este curso xa non hai excusa!
Lembramos que para realizar as fichas de lectura, podemos empregar lápis e/ou rotuladores, intentando facelas sempre o mellor posible e, neste senso, as nosas familias xogarán un papel indiscutible, xa que na casa, ao igual que no cole... non todo vale!
Xa para rematar, nomeamos oficialmente ao noso primeiro contacontos do curso... tocoulle a NICOLÁS! que sen dubidalo escolleu: Peppa va a la piscina (Edit. Beascoa). Ansiosos agardamos a sesión de contacontos coa que nos deleitará o vindeiro venres... preparados?... comezamos!...


Un saúdo e non esquezades que... o noso blogue se alimentará dos vosos comentarios!

NOVAS DENDE NUBARIS!...

viernes, 2 de octubre de 2015

Sen movernos do país onde vivía NUBA e todos os amiguiños que fixeramos onda ela cando tiñamos 3 anos, agora tócalle o turno a MOLI.
Siii, MOLI xa é unha máis da clase!... e esta semana, descubrimos algunha curiosidade da nosa nova mascota.

MOLI é un nubari moi viaxeiro que, deslizándose polo arco da vella co seu paracaídas, consegue chegar ata os sitios máis fascinantes da Terra. E ao regresar de cada lugar leva a súa mochila chea de apaixonantes aventuras e de novos amigos, que quere compartir con todos nós.

Durante o curso, a nosa mascota atoparase nun lugar privilexiado da aula e en cada unidade didáctica servirá de eixe para enlazar os diferentes lugares que imos coñecer a través das súas viaxes. Así pois, viaxaremos ata illas afastadas, pasearemos por terras xeadas, veremos cegadoras cidades, descubriremos impresionantes selvas, navegaremos por apracibles ríos e coñeceremos a calor do deserto...


Que mellor que comezar lembrando as cousas que se agochan no ceo de NUBARIS?... O sol e as nubes, a lúa e as estrelas, o arco da vella, tamén bolboretas e paxaros, tronos... ata SABELA R.G. debuxou unha marabillosa constelación... cantas estrelas!, canta imaxinación nestes debuxos!...


Tamén recreamos a MOLI coloreando o paracaídas e a súa roupa e calzado das súas cores correspondentes, escribimos no paracaídas o noso nome e o de MOLI... sen présa, ao xeito e amodiño, dándolle finalmente forma de títere de pau que hoxe entusiasmados levamos para a casa... fantástico!


E claro, tampouco podía faltar o debuxo de cadanseu MOLI, unha actividade na que se viviron sempre momentos interesantes xa que... os nubaris non teñen orellas!!... alomenos non se lles ve por ningures nas imaxes do conto ou mesmo na mascota... non se nos escapa unha!
Debuxamos e coloreamos MOLIS con camiseta verde e pantalón azul, MOLIS con paracaídas e con mochila, MOLIS cuns flequillos de punta multicolor: azul, vermello, amarelo... en definitiva, MOLI facendo iso que máis lle gusta… viaxar polo infinito e mais alá!
Indubidablemente, cada vez nos soltamos máis á hora de debuxar e, pouco a pouco, as nosas creacións estanse a convertir en auténticas obras de arte... quedaron uns MOLIS estupendos no corcho central da aula!


Ademais de todas estas actividades, e sen esquecer que durante a xornada temos tempo para facer de todo, MOLI tamén xoga un papel importante en diferentes momentos do día: no momento da asemblea matinal e do conto, no momento do xogo libre e/ou dirixido nos rincóns, no momento do tempo de lecer… o compañeiro perfecto para cada ocasión!










Ssschhh!!... Sabede que en todos eses lugares que visitaremos con MOLI nas súas viaxes se ocultan fantásticos tesouros que están a agardar a nosa chegada, sen esquecer, que axiña MOLI se converterá nunha máis da nosa familia... comezamos a aventura!!... preparados?
Un saúdo con sabor a pulpo SANFROILANCEIRO e non esquezades que... o noso blogue se alimentará dos vosos comentarios!