ANTROIDO NA ANEXA.

Hoxe venres, como colofón á semana de antroido, viñemos ao cole cos nosos mellores disfraces e complementos... fantástico!

Así pois, nas asembleas matinais destes días, axiña coidamos que os disfraces e accesorios ocupan un espazo privilexiado nesta celebración onde grandes e pequenos deixamos voar a nosa imaxinación para converternos naquel personaxe que fai que vivamos o antroido de maneira intensa. Ao tempo, tamén aportamos outros elementos e características propias desta celebración como símbolos representativos e postres típicos.

Este ambiente festivo do antroido, favoreceu distintas propostas de traballo que nos permiten avanzar no noso proceso de desenvolvemento.

En primeiro lugar, improvisamos un antiface que pintamos coa cera acostada tentando cubrir de xeito uniforme todo o espazo. Para completar o deseño, pegamos papeis de cores ao chou para dar unha visión de conxunto.

Por outra banda, a véspera do antroido no cole, pintamos a carauta de MUNÍBAL, asociando a cada parte a súa cor: azul mariño para pelo e boca, “azul cielo-camuflado” para o corpo e cor amarela para os cornos... que doado!

Xa hoxe venres, vivimos o antroido no cole... que nervos!... Estabamos ilusionadísimos coa celebración, expectantes, descontrolados...

Hoxe non había tempo para as rutinas propias de cada día e, nunha asemblea diferente, descubrimos, coñecemos e identificamos cada disfrace: funcións, complementos e accesorios... estabamos xeniais!

Ao tempo, reservamos un tempo para debuxarnos con cadanseu disfrace: superheroes, princesas Disney, debuxos animados, personaxes de ficción... ata serpentinas e confete... canto detalle!

Xa a media mañá, no ximnasio, participamos no “Festival de Antroido” onda os compañeiros e compañeiras de 5 ANOS B para mimar e dramatizar “Te voy a esperar” (BSO - Tadeo Jones) de Juan Magán e Belinda que tan entregados preparamos estas semanas... que artistas!

Resultou un acto ameno e non perdemos detalle das cancións de todas as clases do colexio: canta variedade de estilos, cantos disfraces, canto traballo... parabéns ANEXA!... viva o antroido!

Un saúdo e non esquezades que... o noso blogue se alimentará dos vosos comentarios!