RATONCITO PÉREZ.

O paso do tempo é unha realidade e a máis dun e dunha... comezaron a caérselle os seus primeiros dentes!...

Xa vos contaramos a semana pasada que o venres cando estabamos no momento do traballo obrigatorio individual, a SARA, caéuselle un dente, unha situación que propiciou nas asembleas matinais conversas diversas especialmente relacionadas co Ratoncito Pérez.

O Ratoncito Pérez, é e será un dos personaxes fantásticos máis populares na vida dos nenos e nenas de todos os tempos. Recollendo cada noite os dentes de leite caídos e cambiándoos por diferentes agasallos.

Pero... sabedes como o Ratoncito Pérez comezou esta costume?... Coa lectura do conto titulado: El Ratoncito Pérez (Edit. Susaeta), descubrimos o motivo que orixinou esta estraña e divertida costume, concedéndolle a este personaxe un toque se cabe aínda máis máxico.

Como pode un ratiño tan pequeno cos agasallos?... Como entra nas casas?... Como é capaz de deixar os agasallos debaixo da almofada ou da cama sen espertarnos?...

A estas, e a outras cuestións, intentamos dar resposta durante esta semana, realizando, a partir da lectura do devandito conto debuxos varios que amosan a evolución no que a expresión plástica se refire... a festa co batido de amorodo e as escaleras da casa de Blas foron a escena máis recreada!

Asemade, aproveitando este acontecemento inesperado, decidimos achegarnos á Educación para a Saúde, nesta ocasión centrada nos hábitos de hixiene bucodental necesarios para ter o sorriso máis bonito do mundo.

Así, ANDREA durante a semana trouxo o conto en edición bilíngue de Manuela en el dentista (Edit. Buchmann) onde descubrimos como a visita ao dentista pode ser unha emocionante aventura na que a protagonista semella unha astronauta intergaláctica... case nada!

Tras a lectura do conto, desenvolvemos actividades de comprensión lectora para clarificar os feitos acontecidos e ao tempo realizamos unha transposición do relato a situacións vividas. As aventuras e desventuras persoais na consulta do dentista non tardaron en aparecer e, aparentemente, fomos todos e todas moi valentes... claro que si!

Agora xa, a vindeira semana, compilaremos todos os traballos realizados durante o curso, ademais de decidir onde nos gustaría ir de vacacións e gozar dun merecido tempo de descanso e diversión en familia. De seguro que os bits de intelixencia que estamos traballando como actividades de peche, ofrecerannos algún destino interesante que visitar...que mundo de marabillas!

Un saúdo e non esquezades que... o noso blogue se alimentará dos vosos comentarios!