Bienvenido

FELICES E MERECIDAS VACACIÓNS!

jueves, 21 de junio de 2018

Tras unha andadura chea de vivencias, experiencias, descubrimentos e aprendizaxes, hoxe xoves 21 de xuño chega o final do curso co inicio do verán.
Así pois, para rematar o curso como ben merece, esta semana gozamos de diferentes actividades que mudaron de xeito considerable o desenvolvemento de cada xornada escolar... canta cousa concentrada!
Para comezar, organizamos, arquivamos e lembramos parte das actividades impresas desenvoltas ao longo do curso. Neste senso, os materiais que causaron máis expectación foron as actividades impresas que alá polo mes de outubro comezabamos a arquivar en cadansúa gabeta. Había actividades impresas que nin lembrabamos: do San Froilán, do Samaín-Halloween e do outono, da Semana das Letras Galegas... canto traballamos!
Estas e outras actividades impresas tomaron formato de caderniño cunha portada inspirada na película de Buscando a Nemo que, días atrás, visionamos no momento da merenda... estupendo!


Asemade, e ao tempo que faciamos un flashback con algúns dos momentos significativos do curso, xa o LUNS agardábanos a primeira da sorpresas: un pícnic no patio de Educación Primaria onda o resto de nenos e nenas de Educación Infantil. Así que, collemos mochila e gorra e organizámonos nunha roda para gozar do tempo de sol propio destes días.


Pola súa parte, o MARTES, no momento da asemblea anunciouse unha nova coa que non contabamos: a saída ao Parque Rosalía de Castro que quedara suspendida por mor do tempo, tería lugar hoxe... non o podiamos crer!


Ese día, logo das rutinas do súper-encargado -nesta ocasión foi a quenda de PABLO F.-, establecemos algunhas normas e regras de seguridade que debiamos seguir na saída, prestando especial atención ao uso das papeleiras para tirar os restos da merenda -non somos contaminadores-... Tamén, logo da experiencia do pasarrúas do Arde Lvcvs, e para non deixar nada á improvisación, practicamos onda a nosa parella... asi si!


Convertidos nuns auténticos excursionistas: mochila e gorra incorporada, saímos do cole e camiñamos amodo, agarrados da man da nosa parella, non era tempo de correr nin de culebras... xuntos descubrimos nas costas do parque un espazo recollido e apenas coñecido... espectacular!


Non había tempo que perder, así que logo de merendar -este día todos e todas rematamos ao tempo-, deixamos que o noso corpo rode, trepe, caia, corra... resultou un tempo de lecer excepcional.



Na volta, parada obrigada no estanque dos parrulos... que pequerrechos!... que cores!... mágoa dun anaco de pan!... hai que repetir!...


Ao tempo, xa o MÉRCORES e como prometera a profe da horta, en pequeno grupo levamos a cabo a colleita de todo este tempo. Estabamos ilusionados, proba disto foi que na asemblea varios de nós lembramos este pequeno-gran acontecemento no que nas bolsas aportadas polas nosas familias levariamos a colleita para a casa... que ilusión!
E por fin, por fin chegou o XOVES 21 de xuño, día que tiñamos marcado no calendario do panel das rutinas cun corazón en cor vermella... o día no que levariamos todos os traballos elaborados durante o curso.
Hoxe foi un día diferente... era un día de festa onde unicamente tivo cabida a asemblea matinal como actividade dirixida. ICÍA foi a súper-encargada de despedir o curso cunhas rutinas un chisquiño máis longas do habitual que anticiparon parte das novidades do vindeiro curso. O resto foi tempo de xogo libre, tempo de gozar cos xogos e xoguetes da que foi a nosa primeira aula no cole dos maiores, a partires de setembro, un novo espazo dará cabida a todas as experiencias que nos esperan... uf, case preparados!
E aínda quedaba o máis xenial... gozar coas cancións do momento a través da proxección no Encerado Dixital Interactivo (E.D.I.) das últimas novidades do Just Dance 2018... canto rimos!...



Neste ambiente de festa e diversión, xa máis tranquilos xusto uns minutos antes de despedirnos ata setembro, vivimos un momento emotivo cuns convidados especiais... as nosas familias!... GRAZAS de corazón!...
Agora xa, sen esquecer todo o vivido, a disfrutar das tan merecidas vacacións que comezan, aproveitando estes meses de verán para recargar as pilas para os retos e actividades que nos agardan a partir de setembro... este cole como mola!


OS NENOS E NENAS DE 3 ANOS A... DESÉXANVOS UNHAS FELICES VACACIÓNS DE VERÁN!
Un saúdo e non esquezades que... o noso blogue se alimentará dos vosos comentarios!

AVE ARDE LVCVS MMXVIII.

viernes, 15 de junio de 2018

Ilusionados, antes de pechar o curso, reservamos uns días para traballar unha das celebracións organizadas cada mes de xuño na nosa cidade, siii... o Arde Lvcvs xa está aquí!
Asemade, e dada a diversificación de momentos e actividades da nosa xornada, aproveitamos para pechar parte das actividades propias desta data: a celebración dos aniversarios e a elaboración da portada dos traballos do curso.
Así pois, o xoves, celebramos os aniversarios de xuño. Nesta ocasión foi a quenda de HUGO e MARIO, de todos os xeitos, e dado que nos meses de xullo e agosto estaremos de vacacións de verán e non hai cole, aproveitamos para homenaxear como ben merecen a ÁLVARO e IAGO -que cumpren no mes de xullo- e a ICÍA -que terá que agardar ao mes de agosto-.
Xa a primeira hora da mañá, despois da asemblea matinal os homenaxeados puxeron cadansúa coroa na que figuraba nun lugar visible o número 4. Posteriormente, no tempo da merenda cadaquén mudou a súa foto da tarta de 3 anos para a tarta de 4 anos... que expectación!


Do mesmo xeito, sabedores da necesidade de presentar da mellor maneira os traballos elaborados durante o curso como material complementario aos caderniños de MUNA, traballamos na elaboración da súa portada, e para comezar, estampamos a man dereita impregnada en témpera de cor laranxa nun fondo azul que recreará un fondo mariño de sobra coñecido... que será?


Agora ben, se durante estes días, incluso semanas, houbo unha conversa recurrente na nosa aula, esta foi a do Arde Lvcvs.
O Arde Lvcvs comezou a súa andadura no ano MMII ligado ao solsticio de verán cun obxectivo primordial: rememorar a fundación da nosa cidade recreando o seu pasado romano.
Así pois, hai uns días, o casco histórico comezou a transformarse en Lvcvs Augusti, destacada urbe da Gallaecia romana, para ofrecer do 15 ao 17 de xuño un completo programa de actividades.
Neste senso, cunha motivación extra pois quen máis e quen menos xa viviu o Arde Lvcvs de anteriores edicións, e coa axuda do Encerado Dixital Interactivo (E.D.I.), revivimos algúns dos actos máis emblemáticos desta celebración como o pasarrúas a cargo das 17 asociacións de recreación histórica pola Ronda da Muralla... que vestimentas!


Falamos de tropas romanas, tribos castrexas, dos tambores e bandeiras..., descubrindo como as indumentarias da cultura romana e castrexa serán o eixo principal, aprendemos a que no Arde Lvcvs non nos “disfrazamos de...”, senón que nos vestimos, caracterizamos... é outro nivel!
Nembargantes, e como podedes imaxinar, o que resultou máis interesante foi o relacionado co combate e coa loita: identificamos armas propias da época e todo aquilo que poidades imaxinar para facer... guerra!
Sen lugar a dúbidas, a nosa cidade converterase no esceario perfecto para revivir o noso pasado a través dos personaxes da época como os druidas, guerreiros, lexionarios, patricios, sacerdotisas, escravos, emperadores...
Como colofón final a todo o traballo desenvolto, hoxe venres a nosa clase abriu o pasarrúas organizado ata a Praza de España.


Con e sen capa, armadura, bolso, coroa de flores... menuda tropa romana e tribo castrexa!


Non estaba a mellor das mañás no que a tempo se refire, pero cadaquén disfrutou o momento á súa maneira... mesmo nos recibiu a alcaldesa e demais autoridades do concello!


Agora xa, esta fin de semana queda gozar do pasado de Lvcvs Avgvsti máis vivo ca nunca... que non se apague o lume!... que viva o Arde Lvcvs!...


Un saúdo e non esquezades que... o noso blogue se alimentará dos vosos comentarios!