Bienvenido

MISIÓN CUMPRIDA!

viernes, 25 de noviembre de 2016

Embarcados nunha misión espacial, estas semanas descubrimos e identificamos algúns elementos representativos do Sistema Solar, así que… cinturóns abrochados que a viaxe comeza... “hasta el infinito y más allá”!...
Como sabedes, comezamos cada xornada coa asemblea matinal, un tempo adicado á expresión oral, reflexión, organización e secuencia das actividades propias de cada día no que a elección do súper-encargado é un dos momentos clave.
Entre as tarefas que realiza o súper-encargado, ademais da fichaxe de ausencias e presenzas e das actividades de lecto-escritura e de pensamento e razoamento lóxico-matemático, está a rutina de PIPO, o coello espacial.
Chegado este momento, introducímonos na observación e identificación dalgúns fenómenos atmosféricos e meteorolóxicos que se suceden no día a día, constatando en cada caso co seu pictograma correspondente -de sol, sol con nubes, nubes negras e choiva-, o tempo cotiá.


Estes días, a partir desta actividade, e convertidos nuns auténticos astronautas, descubrimos planetas tales como: XÚPITER e VENUS, compostos fundamentalmente de gases e rochas volcánicas, respectivamente.















Tamén coñecemos un dos nosos planetas favoritos: SATURNO, cuxa forma esférica rodeada de aneis de cores nos resulta tan espectacular.


E como non, a TERRA, que resultou o máis doado de recoñecer ao tratarse do planeta no que vivimos.


Nesta viaxe espacial tamén descubrimos as constelacións, agrupacións de estrelas que se atopan no Universo como por exemplo a de O CENTAURO -con forma de animal mitolóxico metade home, metade cabalo-, ou a OSA MAIOR, -con forma de carro sen rodas-.















Vimos cometas como o HALE-BOOP con forma de lume da que sobresaen varias colas... fascinante!


Para esta viaxe espacial, non puidemos atopar o mellor pasaporte: os “Bits de Inteligencia”... como?... non oistedes falar aínda deles?...
Os “Bits de Inteligencia”, resultan de gran utilidade para estimular o cerebro, a aprendizaxe e a memoria, axudando a adquirir novos coñecementos, a desenvolver e ampliar a linguaxe, o hábito e a capacidade de atención, a memoria visual e auditiva, a fomentar a curiosidade e o interese...
Foi tal a expectación que levantou o uso deste material didáctico, que no tempo adicado ao debuxo libre e/ou guiado, plasmamos en diferentes días auténticas producións espaciais.


Ollamos no Encerado Dixital Interactivo (EDI) cores, formas, tamaños e proporcións dos ALIENÍGENAS. Caras verdes, antenas, ollos e brazos sen control... ata alienígenas-chica con vestido, lazo... case nada!


Achegámonos á figura do primeiro home en pisar a lúa, o estadounidense NEIL ARMSTRONG, sen esquecer a VALENTINA TERESHKOVA, primeira muller en viaxar ao espazo exterior... e mesmo a LAIKA, o primeiro animal en orbitar a Terra... que interesante! Debuxamos cohetes, naves espaciais e ata platillos voantes...


Nestes días, formulamos e verificamos hipóteses, xogamos a pensar, miramos no EDI elementos vencellados... HÉCTOR ata modelou con plastilina un cohete!


Ah! E o chándal de LOIS... ideal como lanzadeira de ideas previas!




Agora xa, na vindeira semana, comezaremos a vivir un dos momentos máis especiais do ano: o Nadal. Xuntos no noso blogue, comprobaremos como os Reis Magos existen!... existen no corazón de cada un dos que cren neles!...


Un saúdo e non esquezades que... o noso blogue se alimentará dos vosos comentarios!

"LOS INCREÍBLES MUN"

viernes, 18 de noviembre de 2016

O prometido é débeda!... e tras a conta atrás no calendario das rutinas como todo un gran acontecemento, esta semana incorporamos unha nova rutina á nosa parrilla de clase... a visita semanal da mascota!
“Los increíbles MUN” son uns monstros pequenos, peludos, con moitos dentes e de moitas cores. Todos son diferentes, pero xuntos forman unha gran familia: MUNA, MUNELA e MUNÍBAL.


Como xa vos anunciaramos, a mascota de 4 anos chámase MUNELA. MUNELA é alegre, divertida e moi curiosa, sempre atenta para descubrir os segredos e misterios que se ocultan ao seu redor.


Na historia motivadora da primeira unidade didáctica: “La cama nueva de Munela”, coñecemos elementos tan disparatados como que para pensar en cousas serias, MUNELA cólgase cabeza abaixo dunhas barras, ou mesmo que non lle gusta a auga e que cando lle toca ducha, PABLO e BERTA perséguena coa mangueira ata que non se enxabona por todos lados... que locura!


Durante o curso, MUNELA atoparase situada nun lugar privilexiado da aula e converterase nun excepcional eixo motivador que nos presentará, a través das súas historias, cada centro de interese: a casa e a familia, a alimentación, a rúa e as tendas, os animais e plantas, os medios de transporte e profesións, as paisaxes e a auga... canto traballo!
Do mesmo xeito, MUNELA, converterase nun nexo de unión coas nosas familias grazas á posibilidade da visita deste monstro ás nosas casas e vivir o noso día a día... que emocionante!
Durante estas semanas, MUNELA unicamente baixa da súa casa para presidir, xunto ao súper-encargado, as asembleas matinais: en primeira fila, atenta a todo e co seu ollo aberto sen perder detalle.


Ademais, esta semana MUNELA tivo un papel si cabe máis protagonista que nunca, pois converteuse na compañeira indispensable coa que compartimos diferentes momentos da xornada: o momento do conto, do xogo libre e/ou dirixido nos rincóns, o momento do tempo de lecer...


Agora xa, nos vindeiros días, compartiremos con MUNELA diferentes momentos da nosa vida cotiá: no parque, no supermercado, na casa coas nosas familias... Siii, tamén poderemos levar a MUNELA ao Burguer King e ao MacDonald´s... Agora ben, unha visita case case obrigada será á Muralla de Lugo declarada Patrimonio da Humanidade... será un recordo incrible!
No superlibro, recreamos diferentes elementos que servirán de fío condutor das obras de arte que de seguro chegarán cada semana.



Para iso lembrade familias!!... a visita será semanal (de xoves a xoves) e deberemos de contar o realizado con MUNELA durante a semana que estivo de visita nas nosas cosas. Non se trata de que fagades vos o traballo, nooon, senón de guiarnos no desenvolvemento da tarefa, do mesmo xeito que na escola, no superlibro de MUNELA... non todo vale!


Gomets, témpera, rotuladores, ceras, purpurina... imaxinación ao poder!... ánimo!... quedará un periplo por LUGO do máis creativo!...


Este xoves, máis expectantes que nunca, comezamos dende a asemblea matinal, -incluso na posta e abotoado do mandilón-, formulando hipóteses sobre quen sería o afortunado en levar a MUNELA. Este enigma presente ao longo de toda a xornada, resolveríase na última sesión.
Así pois, sen decatarse, ANTÓN, pola súa condición de súper-encargado, converteuse no primeiro anfitrión de MUNELA... non o podía crer!
ANTÓN, logo duns días convalecente, incorporouse á escola o día idóneo, por riba de converterse no súper-encargado seguindo o listado alfabético do panel das rutinas, sería o primeiro en disfrutar de MUNELA.
Xa o venres, ANTÓN contounos na asemblea que esta fin de semana, MUNELA coñecerá outro bonito lugar da nosa provincia, ANTÓN levará a MUNELA onda a súa avoa de Galdo en Viveiro... que afortunada MUNELA!



E para non botar a MUNELA de menos, que mellor que recreala de diferentes formas, tamaños e cores para decorar o corcho... cada unha no seu estilo... xeniais!




Un saúdo e non esquezades que... o noso blogue se alimentará dos vosos comentarios!

CON CATUXA E CATARINA!

viernes, 11 de noviembre de 2016

Hoxe venres, puxemos o colofón final a uns días de intenso traballo que nos serviron para achegarnos aos cambios que trae consigo o outono.
Así pois, se nos mergullabamos na celebración do Halloween-Samaín coa pantasma Enrique, nesta ocasión, a historia das castañas CATARINA e CATUXA, serviu de alicerce para achegarnos á identificación dalgunhas características que se producen no contorno e na vida das persoas co outono.
Alá polo 22 de setembro, do mesmo xeito que comezaba o outono no calendario, entraba este eixo motivador na nosa aula a modo de actividade impresa na que coloreamos cadansúa árbore iniciándonos por primeira vez na escrita real e contextualizada dun dos nosos primeiros títulos: “OTOÑO”, con lápis, amodo... que difícil nos resultaba!... canto cambiamos!...


Xa logo, estampamos ao chou co dedo pintor impregnado en témpera as follas. A témpera resultou un grato descubrimento...
Bonito, bonito... quedou o noso corcho das rutinas vestido de outono...


O certo é que somos ben afortunados, a media mañá, no momento do recreo, desfrutamos dun enorme patio de xogos con 3 zonas diferenciadas. Unha zona de area de uso exclusivo para os pequerrechos e pequerrechas do mandilón de cor verde (3 anos), unha modesta zona de columpios e unha espectacular zona verde con castiñeiro incluído. Cantas follas, paus, pedras... recollemos do chan!... Ah!, pero é que ademais algúns levamos case a diario para a casa a súa ración de castañas e noces... XOANA é unha crack!


Asemade, unha mañá vimos como un home -supoñemos que se trata do... xardineiro ou varrendeiro do cole??-, varría as follas facendo pequenos montóns. Axiña PAULA, vasoira en man, non dubidou en intentar facer o seu montonciño, complicado dabondo... canto pesaba e que longa era a vasoira!


Durante estas semanas, decatámonos que ademais das follas, outro elemento característico do outono son os cogomelos, por iso, para o concurso organizado pola “Sociedade Micolóxica Lucus”, participamos onda o resto das aulas de Educación Infantil nun mural en 3D. Modelamos con plastilina de cores cogomelos diferenciando: o pé e o sombreiro.


O máis difícil foi non misturar a plastilina, por iso, organizámonos nun improvisado obradoiro de modelado no que cada mesa-equipo, debía elaborar unha parte do cogomelo. Plastilina de cor branca, vermella, amarela e laranxa... con axuda quedaron uns cogomelos estupendásticos!...














E o resultado final... xenial!... Profe Sonia e Alberto son uns artistas!, mágoa que a exposición durase tan pouco...


Por outra banda, no tocante á celebración do magosto, como un gran acontecemento marcamos no calendario das rutinas, -nada máis e nada menos que con rotulador fluorescente de cor verde-, o día do magosto e..., por fin chegou o día!
Tratábase dun día especial, diferente, non tivemos asemblea, e a primeira hora recibimos a visita de 6ºA que nos contou unha historia apoiados nunhas láminas orixinais que nos deixaron como agasallo... parabéns!


Pola contra, para este día, preparamos como auténticos súper-maiores á castaña CATARINA para a coroa e á castaña CATUXA para o cucurucho.


Iluisionadísimos, LOIS e LARA contáronlle á teacher Mar a teima de CATARINA... quería ser pallaso!











Xa no edificio dos maiores, logo do patio, o profe José Antonio e a profe Herminia, nos repartiron unha présa de castañas... algunha estaba quentiña!



O encontro con MARINA, NOA, CARMEN, HÉCTOR, entre outros,... foi total!... por fin o profe coñeceu aos nosos irmáns!...


Logo, participamos no xogo de “coelliños ao tobo”, saltando cos pés xuntos e depositando a castaña no espazo indicado... canto animamos!


Probamos puntería co “come castañas”... intentámolo unha e outra vez!


Para rematar e voltar á calma, seguimos o percorrido sen saírnos do camiño marcado no chan para levar as castañas ata a casa... paciencia!


O magosto non defraudou, e para deixar constancia deste momento, debuxamos o xogo que máis nos gustou... “coelliños ao tobo” o máis recreado!


E para a semana que vén, un novo acontecemento marcado novamente no calendario das rutinas, desta vez con rotulador fluorescente de cor rosa, sucederá o xoves... trátase dunha rutina que levamos tempo agardando... unha rutina semanal coa que xa nada voltará a ser igual!...      


Un saúdo e non esquezades que... o noso blogue se alimentará dos vosos comentarios!