MUNELA, BENVIDA!!

Como xa vos anunciaramos o curso pasado, a mascota de 4 anos chámase MUNELA. MUNELA é alegre, divertida e moi curiosa, sempre atenta para descubrir os segredos e misterios que se agochan ao seu redor.

Nestes días nos que a festa segue tan presente na nosa cidade -San Froilán está a piques de rematar-, redescubrimos a MUNELA a través da lectura da historia motivadora da primeira unidade didáctica: “La cama nueva de Munela”. Así pois, coñecemos elementos tan disparatados como que para pensar en cousas serias, MUNELA cólgase cabeza abaixo dunhas barras, ou mesmo que non lle gusta a auga e que cando lle toca ducha, PABLO e BERTA perséguena coa mangueira ata que se enxaboa por todos lados... que locura!

Do mesmo xeito que MUNA cando tiñamos 3 anos, MUNELA durante este curso atoparase situada nun lugar privilexiado da aula e converterase nun excepcional eixo motivador que nos presentará, a través das súas historias, cada centro de interese... canto traballo nos agarda este curso!

Pero... na aula hai dúas MUNELA?... Claro, temos unha MUNELA na zona do traballo obrigatorio a carón de MARTÍN F. e outra MUNELA na zona da asemblea que se converterá en aliada do súper-encargado... fantástico!

Como podedes imaxinar, as comparativas entre MUNA e MUNELA resultaron inevitables: cor característica, número de ollos, brazos e pernas, cornos de cor amarela idénticos, mochila e bolso case case igual... Ao tempo, coidamos na que será a nosa mascota de 5 anos: MUNÍBAL. Todos son diferentes, pero xuntos forman unha gran familia: “Los increíbles MUN”.

Esta semana de presentación de mascota, MUNELA tivo un papel  protagonista e xuntos compartimos diferentes momentos da xornada: o conto, o momento do xogo libre e/ou dirixido en rincóns, o momento do tempo de lecer...

Asemade, e como actividades para deixar testemuña dos nosos descubrimentos e aprendizaxes, coloreamos sendas actividades impresas nas que MUNA, unha vez máis, é o elemento motivador ideal.

Neste senso, nunha das actividades impresas, aproveitamos para recrear o noso esquema corporal ao que cada vez integramos máis elementos… canta cor!.. .canto detalle!… parabéns!…

Siii, aínda que MUNELA será a protagonista de cada historia, non estará soa e un curso máis PABLO e BERTA ensinarán a MUNELA a comprender o seu pequeno-gran mundo… ser un monstro non é de todo doado! 

Para iso cadaquén rodeou con rotulador e coloreou con cera plástica a un ou outro personaxe segundo o propio sexo. Ademais, para disipar dúbidas no que a cores se refire, estes días as siluetas de PABLO e BERTA presiden a nosa aula… por se eramos poucos!

E para rematar… que mellor que decorar un tiovivo case case igual ao do San Froilán… parece sinxelo, pero moito ollo, á norma de non levantar o rotulador, engadimos por primeira vez a realización de series de dúas cores… bonitas, bonitas combinacións de cores...

Un saúdo e non esquezades que... o noso blogue se alimentará dos vosos comentarios!

SAN FROILÁN 2018.

Nuns días nos que en Lugo se respira xa olor a polbo e a cachelos, a nosa aula comeza a vestirse de festa e as conversas arredor da inminente celebración do San Froilán 2018 supuxeron  distintas experiencias que non pasamos por alto.

Así pois, desenvoltas as rutinas e tarefas cotiás propias do súper-encargado, as asembleas matinais de principio de curso están a resultar un chisquiño máis longas que de costume, pois ademais de servirnos para establecer e consensuar parte das normas que rexerán a vida da aula ao longo do curso, cadaquén, de xeito cada vez máis natural e espontáneo aproveita para contar interesantes anécdotas propias.

Neste senso, a celebración do San Froilán trouxo consigo diferentes faladoiros onde o eixo vertebrador foron fundamentalmente as barracas.

Nas conversas dirixidas deste curso faremos especial fincapé nas regras que rexen os intercambios lingüísticos: erguer a man para falar, ser pacientes e agardar a quenda en silencio, respectar e escoitar cando un compañeiro ou compañeira fala, non acaparar sistematicamente as conversas... Tendo máis o menos claras estas e outras normas básicas de diálogo fixemos diferentes achegas sobre como vivimos o San Froilán...

Como podedes imaxinar, San Froilán na nosa aula son barracas, atraccións e lambonadas..., este curso nótase que xa non somos os pequerrechos do cole e o “tren de la bruja” centrou parte das conversas, expectantes por montar nesta atracción no que a pesar do nome, PABLO A. e VALERIA deixaron claro que non hai ningunha bruxa, senón un pallaso que, vasoira en man, ameniza a viaxe... soa xenial!

Tamén falamos das colchonetas, dos karts, do tren, do scalextric..., e por suposto das atracción dos máis maiores, que se ben temos claro que non podemos montar, chámannos a atención un montón... 

Neste senso, e como actividade final que servirá como testemuña desta e outras experiencias significativas que viviremos durante o curso, deixamos voar a nosa imaxinación e creatividade recreando o noso San Froilán particular: soles, nubes, corazóns, árbores, esquemas corporais aos que cada vez lles faltan menos detalles..., mesmo hai quen se atreveu a debuxar un polbo... parabéns!

Por último, para rematar estas e outras actividades que serven de preludio á troula que presidirá a nosa cidade nos vindeiros días, que mellor que decorar o corcho do corredor cos polbos que pintaramos días atrás... bonito, bonito quedou o corredor vestido de festa... siii, o San Froilán 2018 está aquí!

Agora xa, toca gozar da festa e aproveitar para coller folgos renovados, axiña comezaremos os cadernos de actividade de MUNELA, mentres, seguimos consolidando, ampliando e reforzando conceptos e normas na realización da actividade individual... case case preparados!

Un saúdo con sabor a polbo sanfroilanceiro e non esquezades que... o noso blogue se alimentará dos vosos comentarios!

COMEZAMOS!...

Mergullados nas rutinas que rexerán a vida da aula durante este curso, esta semana farémosvos partícipes das nosas primeiras actividades impresas de 4 anos como preludio ao traballo máis sistematizado que levaremos a cabo nos caderniños de MUNELA que comezaremos proximamente.

En primeiro lugar, establecemos e tentamos consensuar as normas de obrigado cumprimento durante o momento de traballo obrigatorio. Este curso ao ser un dos grupos dos nenos e nenas de 4 anos debemos concienciarnos de que non todo vale e que, na medida do posible, tentaremos dar o mellor de cada un no tempo de traballo individual en mesa.

Neste senso, e parece ser que cada vez máis concienciados de que non todo vale, de que hai que traballar amodo, procurando non saírnos do contorno, sen deixar ocos nin “rayajos”... os nosos traballos resultan cada vez máis elaborados; mudando moi progresivamente esa tolería por rematar axiña por unha actitude relaxada e libre de tensións cando nas primeiras horas desenvolvemos en silenzo o traballo obrigatorio... marabilloso!...

Con todo e agora, sabemos que no tempo de traballo en mesa debemos estar moi atentos na explicación de cada actividade para saber que facer. Este curso, a interpretación libre está prohibida,... moito ollo!... Para iso, cómpre poñer todo da nosa parte para facelo o mellor posible, e así, cando levemos os materiais para a casa, as nosas familias se poñan contentas.

Tamén nestes días descubrimos un accesorio que nos facía ilusión estrear... os estoxos de dous compartimentos!... Claramente dispuxemos que se gardaría en cada compartimento -lápis e cores-, ao tempo que lembrabamos o seu uso correcto e ubicación na mesa... isto si é de maiores!

Indubidablemente están resultando uns días intensos para comprobar todo o que lembramos do curso anterior e tamén todo o que esquecemos, neste senso, as tarefas do súper-encargado poñen a proba a cotío as nosas aprendizaxes... xenial!

Porén, case case comezamos dende o principio coas letras do abecedario, co trazo dalgúns números seguindo a direccionalidade correcta, coloreamos, debuxamos formas cada vez máis distinguibles: soles, nubes, casas, flores, árbores... mesmo hai quen se atreveu a debuxar a súa casa!

Todo isto, foi o resultado dun traballo sistemático previo no que tachamos, rodeamos, unimos, escribimos... con lápis e/ou rotulador para que o trazo resulte máis preciso... como se colle a cera para colorear ao xeito, sen présas para non saírnos do contorno...  non todo vale!...

Por último, e aproveitando como alicerce motivacional as festas de San Froilán que comezan a vindeira semana, coloreamos un polbo que en gran grupo acordamos podería ser de cor lila-violeta, rosa e mesmo de cor vermella... Os resultados cada vez máis de súper-maiores axiña decorarán o corcho do corredor para non esquecer que... o San Froilán 2018 está aquí!

Un saúdo e non esquezades que... o noso blogue se alimentará dos vosos comentarios!

PRIMEIROS DÍAS...

Siii, esta semana comezou o cole e, aínda que pasaron xa máis de dous meses dende que moitos nos vimos por última vez, parece que foi onte cando rematabamos 3 anos... como pasa o tempo!

Así pois, a volta ao cole estase convertendo nunha experiencia chea de sorpresas, comezando xa polo cambio de aula...

Neste senso, de sobra nos lembramos da mascota que nos acompañará durante este curso, porén, atopar a porta de MUNELA resultou unha das primeiras tarefas da xornada inaugural... ben doado!

Xa na aula, alucinamos coa nova disposición das mesas, co panel das rutinas onda o tren dos aniversarios, coa variedade de pezas de construción de todas as cores, tipos e tamaños... e co banco de carpinteiro, unha das derradeiras adquisicións da nosa nova aula... fantástico!

Máis tranquilos, cadaquén sentou onde prefería e, casualmente as parellas de “mellores amigos” de 3 anos non dubidaron en sentarse onda o seu “mellor amigo ou amiga” de 3 anos: SIRA con CRISTINA, PABLO A. con MARTÍN F., ICÍA con VALERIA, HUGO con JUAN... estabamos encantados!

Por outra banda, e para dar inaugurado oficialmente o curso como ben merece, lembramos algunhas das rutinas cotiás propias da asemblea de 3 anos. Desta vez foi a quenda de PABLO A. que, convertido nun auténtico súper-encargado, lembrou parte das rutinas de 3 anos con cancións incluídas... perfecto!

O que non sabiamos é que xa na asemblea de 4 anos haberá novidades en forma de retos que probarán as nosas aprendizaxes: escrita de números, ditado de letras e, xa máis adiante de fonemas... que interesante!

Uf!... con tanta novidade non nos lembrabamos nin de merendar para poder gozar da selección de pezas de construción de cactos, robots e cuadras... case as mesmas que tiñamos na aula de 3 anos... diversión garantizada!

E canta plastilina?... Vermella, amarela, azul, verde, branca... ata de cor carne... esta clase si que mola!

Estes días de volta á escola están sendo diferentes, son días de sorpresas, de festa e diversión, e proba disto foi que en máis dunha ocasión, fomos os primeiros en saír ao patio... alucinante!

Mesmo un día, organizados nunha fila cada vez máis silenciosa, achegámonos á nosa aula do curso pasado e visitar aos “pequeñajos” de mandilón de cor azul... cantos recordos!... moita sorte!...

Como podedes imaxinar, durante estes días tamén houbo tempo para o traballo obrigatorio individual que nos serviu para lembrar, reforzar e/ou consolidar conceptos tratados o curso pasado: lóxica-matemática, lecto-escritura, formas, cores...

Este curso preséntasenos un gran reto: desenvolver a tarefa todo o mellor que sabemos e traballar en silencio como nenos de 4 anos... acadarémolo?

Non sabemos como se desenvolverá o resto do curso, pero alomenos de momento estamos contentos, nerviosos, ilusionados... raros!, o profe notounos maiores, unha proba evidente do paso do tempo e do noso proceso de desenvolvemento, xa estamos na clase de 4 anos e... este curso promete!

Un saúdo e non esquezades que... o noso blogue se alimentará dos vosos comentarios!

3, 2, 1... DESPEGAMOS!

Logo dunhas merecidas vacacións de verán, voltaremos vernos o vindeiro mércores 12 de setembro e, aínda que nos custará coller de novo os hábitos e o ritmo de traballo acadados ao longo do curso pasado, seguro que máis dun está desexando atoparse co resto de compañeiros e compañeiras.

Este curso non se trata dun curso máis... nooon!!; deixamos de ser os pequerrechos e pequerrechas do cole e porén deberemos dar exemplo aos nenos e nenas de 3 anos: intentaremos non chorar nas entradas, portarnos xenial en cada momento da xornada, facer o traballo cotiá do mellor xeito posible... todos xuntos o lograremos!

Indubidablemente será un curso de grandes cambios: nova aula -quedamos no semisoto, pero agora, no canto de estar na última aula do corredor, estaremos na primeira,... gran cambio!-, tamén deixamos na aula de 3 anos a MUNA para coñecer a un novo MUN, MUNELA que xa fica nun lugar privilexiado da asemblea, tamén o uso do estoxo e dos materiais seleccionados para este curso... canta novidade!

Notaredes que vimos con moitas moitiiísimas ganas, sabedores de que como non podía ser doutro xeito, as nosas familias estarán sempre ao noso carón felicitándonos polos éxitos acadados e alentándonos a intentalo unha e outra vez ata conseguilos... contamos convosco familias!

Neste senso familias LEMBRADE que o primeiro día de clase a incorporación realizarase pola porta da Avenida de Ramón Ferreiro (ala sur). O resto do curso, seguiremos entrando pola porta da Rúa Pintor Corredoira.

Xa pois, o mércores comezamos o novo curso, e a medida que avance o calendario escolar iranse sucedendo as distintas actividades e conmemoracións que marcarán o ritmo da nosa aula: as cabazas do Halloween-Samaín, compartiremos soños e ilusións no Nadal, as máscaras e disfraces do Antroido... e moitos máis pequenos-grandes acontecementos que vos contaremos no noso blogue; un blogue que con esta entrada dá por inaugurado oficialmente o curso académico 2018-2019... preparados?

Un saúdo e non esquezades que... o noso blogue se alimentará dos vosos comentarios!