Bienvenido

SAN FROILÁN 2019.

viernes, 4 de octubre de 2019


Nuns días nos que en Lugo se respira xa olor a polbo e a cachelos, a nosa aula comezou a vestirse de festa e as conversas arredor da inminente celebración do San Froilán 2019 son inevitables.
Así pois, desenvoltas as rutinas e tarefas cotiás propias do súper-encargado, as asembleas matinais están resultando un chisquiño máis longas que de costume, pois ademais de servirnos para establecer e consensuar as normas que rexerán a vida da aula, cadaquén aproveita para contar anécdotas propias que, nestes días xiran arredor da celebración do San Froilán.


Como podedes imaxinar, San Froilán na nosa aula é sinónimo a barracas. Este curso nótase que somos súper-maiores e o “Gran Prix” centrou parte das nosas conversas.
Tamén falamos das colchonetas, dos karts, do tren, do scalextric..., e por suposto das atraccións dos maiores como “El Ratón Vacilón” e a “Casa do   Terror”... que emocionantes!
Estas e outras achegas significativas quedaron reflectidas nuns debuxos que, máis que nunca, serviron para deixar voar a nosa imaxinación e creatividade, recreando o noso San Froilán particular con todo detalle: luces de festa, fogos artificiais, atraccións variadas... cantas cores!


Por outra banda, este curso, aproveitamos para achegarnos aos Pelúdez. Pelúdez é un home de aldea que se vén vivir a Lugo durante as festas. Onda Filomena -a súa muller-, Peludeciño -o seu fillo-, Vanessa -a nora-, Harrisonciño -o neto- e Reborita das Arieiras -a consogra-, Pelúdez cóntanos o que ve e atopa no San Froilán, converténdose en todo un símbolo das nosas festas.
Así pois, coloreamos a Pelúdez e a Filomena en sendas actividades impresas nas que ademais, repasamos conceptos básicos como lonxe/preto e lixeiro/pesado. Abofé que Filomena celebrará un menú ben especial con tanto produto na súa bolsa da compra... fantástico!



Agora xa, toca gozar da festa e coller folgos renovados, axiña comezaremos un novo libro de MUNÍBAL, ao tempo que seguimos consolidando, ampliando e reforzando conceptos básicos vencellados á lecto-escritura e á lóxica-matemática.
Boas festas, bo San Froilán 2019!...


Un saúdo con sabor a polbo sanfroilanceiro e non esquezades que... o noso blogue se alimentará dos vosos comentarios!

MUNA, MUNELA E MUNÍBAL.

viernes, 27 de septiembre de 2019


Logo de levar a cabo diferentes actividades que puxeron a proba as nosas aprendizaxes previas; esta semana comezamos os tan ansiados materiais de 5 ANOS.
Neste senso, e mergullados en “Los increíbles Mun”, o primeiro que fixemos foi observar, identificar e nomear algunhas das características de MUNÍBAL, -mascota de 5 ANOS-, establecendo comparacións con MUNA e MUNELA, -mascotas de 3 e 4 ANOS-.
Axiña coidamos que MUNÍBAL tiña o corpo, o pelo e ata a boca de cor azul, así que diferenciamos de que azul se trataba en cada caso: azul mariño para pelo e boca e “azul cielo-camuflado” para o corpo. Asemade,  descubrimos que, do mesmo xeito que MUNA e MUNELA, MUNÍBAL, ten os cornos de cor amarela e que as pernas e os brazos non son dobres... “Los increíbles MUN”, teñen brazos e pernas de “espantapájaros”!...


Así pois, para rematar esta etapa como ben merece, contaremos como mascota con MUNÍBAL, un monstro aventureiro e tenro que, entre outros cometidos, propiciará un achegamento cara a lecto-escritura.
Este curso, MUNÍBAL atoparase situado nun lugar privilexiado da aula e converterase nun excepcional eixo motivador que nos presentará, a través das súas historias, cada centro de interese: a familia, o corpo humano, a literatura infantil, os medios de comunicación, a natureza,... canto traballo!



Indubidablemente, ao estar na aula de 5 ANOS, debemos prestar máis atención que nunca ao traballo propio, despreocupándonos do traballo alleo, sen présa, amodo, con paciencia e bo facer... non todo vale!



Agora xa, non hai escusas, cómpre poñer todo da nosa parte para facelo o mellor que sabemos, desenvolvendo por orde as instrucións que se indican en cada actividade: rodeamos, riscamos, unimos, coloreamos, pegamos gomets, escribimos palabras, trazamos números... 


Do mesmo xeito, no tempo adicado ao traballo obrigatorio en mesa, debemos cumprir as normas establecidas: traballar en silenzo, non erguerse ata rematar a actividade e, de ser o caso, borrar ao final... que complicado! 


Non se trata duns libros calquera... nooon!! Trátase duns libros diferentes, especiais; son libros de súper-maiores, con actividades que nos axudarán a comprender o noso pequeno-gran mundo... fantástico!
E a vindeira semana?... A vindeira semana cadaquén celebrará as festas da nosa cidade ao seu xeito, dando conta do vivido nas asembleas e nos tempos de faladoiro porque siii, o San Froilán 2019 xa está aquí!... preparados?...


Un saúdo e non esquezades que... o noso blogue se alimentará dos vosos comentarios!

COMA SÚPER-MAIORES!

viernes, 20 de septiembre de 2019


Mergullados nas rutinas que rexerán a nosa aula durante este curso, esta semana farémosvos partícipes das nosas primeiras actividades impresas de 5 anos como preludio ao traballo máis sistematizado que levaremos a cabo nos caderniños de MUNÍBAL que comezaremos a vindeira semana.
En primeiro lugar, lembramos as normas de obrigado cumprimento no momento de traballo obrigatorio. Este curso máis que nunca, ao ser un dos grupos de 5 anos, debemos concienciarnos de que non todo vale e que, na medida do posible, tentaremos dar o mellor no tempo de traballo individual.
Neste senso, e parece ser que cada vez máis concienciados disto, os nosos traballos resultan elaborados con máis detalle, alomenos amosámonos máis relaxados e libres de tensións... marabilloso!


Con todo, sabemos que no tempo de traballo en mesa debemos estar máis atentos na explicación de cada actividade; isto séguenos custando especialmente, temos demasiada ansia por organizar o traballo alleo e os resultados ás veces son caóticos, propios da interpretación libre do traballo establecido. Cómpre prestar máis atención, e así, cando levemos os materiais para a casa, as nosas familias queden abraiadas co traballo desenvolto.


Indubidablemente están resultando uns días intensos para comprobar todo o que lembramos do curso anterior e tamén todo o que esquecemos, neste senso, as tarefas do súper-encargado poñen a proba as nosas aprendizaxes... xenial!
Porén, case case comezamos dende o principio coas letras do abecedario a partir da escrita real e contextualizada de palabras significativas como “COLEGIO” e “MUNÍBAL”, co trazo de números seguindo a direccionalidade correcta, coloreamos, debuxamos formas distinguibles, repasamos conceptos básicos (diante/detrás, pesado/lixeiro...)...
Unha das actividades impresas que máis expectación levantou foi a que nos serviu para descubrir algunha das características de MUNÍBAL, a mascota de 5 ANOS. Axiña advertimos as súas cores: os cornos de cor amarela coma o resto da familia MUN, azul escura para pelo e boca, azul clara ou “azul cielo-camuflado” para o corpo... estupendo!


Ao tempo, consolidamos estes descubrimentos debuxando cadanseu MUNÍBAL coas cores indicadas en cada caso... fantásticos resultados!


E que mellor maneira que combinar todo este traballo de avaliación inicial que co xogo libre e/ou semidirixido nos rincóns... Este curso, sempre que a xornada se desenvolva con normalidade, introducimos como novidade os “rincóns exprés”... vaia feira!


Un saúdo e non esquezades que... o noso blogue se alimentará dos vosos comentarios!

CURSO 2019-2020: COMEZAMOS!

viernes, 13 de septiembre de 2019

Siii, esta semana comezou o cole e, aínda que pasaron xa máis de dous meses, parece que foi onte cando rematabamos 4 anos... como pasa o tempo!
Así pois, a volta ao cole estase convertendo nunha experiencia chea de sorpresas.
Neste senso, de sobra sabiamos que este curso ademais de mudar de aula, tamén mudariamos de andar, pasando do semisoto á entreplanta onda a outra aula de 5 anos.


Ao tempo, atopar a porta da nosa aula resultou ben doado, non por atoparse como en cursos anteriores a mascota de nivel como elemento identificativo, senón pola nosa fotografía de grupo... estupendo!


Xa na aula, axiña sacamos a prenda de abrigo para colgala no percheiro. Este curso, o noso nome e fotografía non están na mesma orde que o curso pasado... moita atención!


Quedamos abraiados coa disposición das mesas, co panel das rutinas, coa variedade de xogos, xoguetes e pezas desta aula... diversión garantizada!
Máis tranquilos, cadaquén sentou, alomenos de momento, onde prefería e, casualmente as parellas de “mellores amigos” non dubidaron en sentarse onda o seu “mellor amigo ou amiga”... estabamos encantados!


Por outra banda, e para dar inaugurado oficialmente o curso como ben merece, lembramos de xeito xeral a nosa asemblea. 


Como é habitual, a orde alfabética establece que PABLO A. se converta no primeiro súper-encargado do curso, lembrando parte das rutinas establecidas ata o momento. Xa logo, foi a quenda de MARIO...


O que non sabiamos é que na asemblea de 5 anos haberá novas rutinas que probarán as nosas aprendizaxes para lembrar, reforzar e/ou consolidar conceptos tratados o curso pasado: cálculo aritmético de sumas e restas, ditado de letras, lectura individual e/ou grupal, iniciación á escrita en minúscula a partir do propio nome... e todo en encerado de rotulador... fantástico!
Estes días de volta á escola están sendo diferentes, son días de sorpresas, de festa e diversión, días de reencontros e lembranzas que, a modo de avaliación inicial, nos serven para determinar os coñecementos previos de cara ao inicio da primeira unidade didáctica coa que coñeceremos máis detalladamente a MUNÍBAL, a mascota de 5 anos.


Este curso preséntasenos de novo un gran reto: desenvolver a tarefa cotiá todo o mellor que sabemos e traballar en silencio... acadarémolo?
Non sabemos como se desenvolverá o resto do curso, pero alomenos de momento estamos contentos, nerviosos, ilusionados... raros!, o profe notounos maiores, xa estamos na clase de 5 anos e... este curso promete!


Un saúdo e non esquezades que... o noso blogue se alimentará dos vosos comentarios!

É TEMPO DE VERÁN!...

lunes, 1 de julio de 2019


Tras unha andadura chea de vivencias, experiencias, descubrimentos e aprendizaxes, chega o final do curso co inicio do verán... é tempo de VERÁN!
O verán é un período vacacional, e resulta importante gozar del como tal; nembargantes, as familias debedes ter en conta que calquera xogo ou actividade cotiá pode adquirir certo trasfondo pedagóxico.
Por iso, ademais de xogar, ir á praia, ao parque, de viaxe visitar novos lugares... é importante, sempre que sexa posible, realizar tarefas que sirvan de medio para consolidar algunhas das capacidades adquiridas ao longo do curso. Non se trata de facer fichas como as da escola, senón de non perder o hábito e a actitude de traballo.
Dende un enfoque lúdico, poderemos desenvolver distintas actividades, non como unha obriga, senón como unha rutina que levamos a cabo día a día durante as nosas tan merecidas vacacións.
Neste senso, resulta importante destacar respeto á lecto-escritura, que un lector non nace, faise, para iso, as familias debedes transmitirnos o valor da lectura como unha fonte de aproximación a novos coñecementos e como unha porta aberta ao mundo da fantasía.
Destacar o importante que resulta que non nos iniciedes no proceso lector, xa que moitas veces, inconscientemente, xerádesnos frustracións e angustias innecesarias cara unha aprendizaxe custosa á que lle prestaremos especial atención o vindeiro curso, paciencia...
Entre outras das posibles actividades que podemos levar a cabo durante estas vacacións, primando sempre o periodo vacacional e de descanso, estarían:
  • identificación e trazado de grafemas. Non nos poñades letras para copiar,... iso está chupao! agora xa somos maiores e deberiamos saber trazar as letras seguindo o ditado de grafemas... facemos a proba?
  • recoñecemento, e moi especialmente trazado de números significativos, a algún todavía se nos resiste a identificación e grafía dalgúns números... coa vosa axuda o lograremos!,
  • seguir traballando as cores, os trazos e as formas planas, aprendendo a identificalas en elementos do contorno cotiá,
  • tampouco deberemos esquecernos da expresión plástica, así que deixade que nos expresemos artisticamente e de xeito libre,... sen modelos! Non esquezades que é máis importante o proceso que o produto, xa que este dependerá do noso grao madurativo e da nosa particular visión do mundo.
Todo isto, por suposto, sen esquecer de gozar as tan merecidas vacacións que acabamos de comezar, aproveitando estes meses para recargar as pilas para todos os retos e actividades que nos agardan a partir de setembro...

OS NENOS E NENAS DE 4 ANOS A,
DESÉXANVOS UNHAS MOI FELICES VACACIÓNS DE VERÁN!!