LEMOS CON CAILLOU E PEPPA...

A partir desta semana, incorporamos unha nova actividade á nosa parrilla de clase, a rutina do préstamo semanal de biblioteca.

Esta nova rutina, servirá para que nos sigamos familiarizando coa dinámica da biblioteca, para que nos ilusionemos cun ambiente propicio á lectura no ámbito escolar e familiar e para que nos contaxiemos do entusiasmo dos libros como portadores dun mundo máxico e marabilloso.

Ao longo de cada semana, coa axuda das nosas familias traballaremos o conto para comprender o seu argumento, xa que cada venres, nomearemos un contacontos seguindo a orde da casiña do panel de rutinas que “lerá” o conto ao resto do grupo a través da intepretación das súas imaxes e ilustracións.

Entre as moitíiisimas actividades que se poden levar a cabo a partir do conto están: as actividades de comentar que axudan a asimilar o conto e realizar unha trasposión dos feitos ás experiencias vividas, actividades de xogo dramático, representando os roles dos protagonistas, actividades de creación de historias: a ensalada de fábulas ou o binomio fantástico de Gianni Rodari...

O contacontos semanal, terá o privilexio de elexir o conto co que quere deleitarnos na súa sesión de contacontos, o resto levará o conto asignado ao azar... non pasa nada!, todos teñen algo de interesante, divertido ou curioso.

Moi entusiasmados coa actividade do préstamo, o venres fomos á biblioteca non sen antes lembrar as normas que debemos seguir cada vez que acudimos ao pabillón dos maiores... canto nos gusta correr!

Xa na biblioteca, lembramos as súas normas, usos e funcións, sen perder de vista tooodos os libros, contos, álbumes, DVD´s... que alí se atopan.

Logo, descubrimos os contos que levaremos durante alomenos este primeiro trimestre: as coleccións de Caillou e Peppa Pig... fantástica sorpresa!

CAILLOU é un neno de 4 anos que todo o que atopa ao seu arredor convírtese na excusa perfecta para unha nova aventura, aprender cousas novas e así descubrir o seu pequeno-gran mundo... que interesante!

PEPPA PIG é unha divertida porquiña que xunto coa súa familia e cos seus amigos, viviremos mil e unha aventura: a primeira vez no dentista, na piscina, no parque de atraccións... historias que contribuirán á transmisión de valores tales como a solidariedade, o respecto, a igualdade, a colaboración...

A medida que avance o curso, estes contos irémolos cambiando por outros máis de maiores; e serán máis de maiores porque coa axuda das nosas familias poderemos silabealos, lelos como auténticos súper-maiores, pero para iso aínda temos moooito que traballar, así que... paciencia! Ler ten que ser un tempo de pracer, de diversión e de disfrute... non o esquezades, familias!

Este curso ademais, continuaremos coa realización das fichas de lectura. Nesta tarefa, como non podía ser doutro xeito, nós deberemos ser os protagonistas absolutos da actividade, encargados de cubrir os datos solicitados e de realizar o debuxo do conto... este curso xa non hai excusa!

Lembramos que para realizar as fichas de lectura, podemos empregar lápis e/ou rotuladores, intentando facelas sempre o mellor posible e, neste senso, as nosas familias xogarán un papel indiscutible, xa que na casa, ao igual que no cole... non todo vale!

Xa para rematar, nomeamos oficialmente ao noso primeiro contacontos do curso... tocoulle a NICOLÁS! que sen dubidalo escolleu: Peppa va a la piscina (Edit. Beascoa). Ansiosos agardamos a sesión de contacontos coa que nos deleitará o vindeiro venres... preparados?... comezamos!...

Un saúdo e non esquezades que... o noso blogue se alimentará dos vosos comentarios!

NOVAS DENDE NUBARIS!...

Sen movernos do país onde vivía NUBA e todos os amiguiños que fixeramos onda ela cando tiñamos 3 anos, agora tócalle o turno a MOLI.

Siii, MOLI xa é unha máis da clase!... e esta semana, descubrimos algunha curiosidade da nosa nova mascota.

MOLI é un nubari moi viaxeiro que, deslizándose polo arco da vella co seu paracaídas, consegue chegar ata os sitios máis fascinantes da Terra. E ao regresar de cada lugar leva a súa mochila chea de apaixonantes aventuras e de novos amigos, que quere compartir con todos nós.

Durante o curso, a nosa mascota atoparase nun lugar privilexiado da aula e en cada unidade didáctica servirá de eixe para enlazar os diferentes lugares que imos coñecer a través das súas viaxes. Así pois, viaxaremos ata illas afastadas, pasearemos por terras xeadas, veremos cegadoras cidades, descubriremos impresionantes selvas, navegaremos por apracibles ríos e coñeceremos a calor do deserto...

Que mellor que comezar lembrando as cousas que se agochan no ceo de NUBARIS?... O sol e as nubes, a lúa e as estrelas, o arco da vella, tamén bolboretas e paxaros, tronos... ata SABELA R.G. debuxou unha marabillosa constelación... cantas estrelas!, canta imaxinación nestes debuxos!...

Tamén recreamos a MOLI coloreando o paracaídas e a súa roupa e calzado das súas cores correspondentes, escribimos no paracaídas o noso nome e o de MOLI... sen présa, ao xeito e amodiño, dándolle finalmente forma de títere de pau que hoxe entusiasmados levamos para a casa... fantástico!

E claro, tampouco podía faltar o debuxo de cadanseu MOLI, unha actividade na que se viviron sempre momentos interesantes xa que... os nubaris non teñen orellas!!... alomenos non se lles ve por ningures nas imaxes do conto ou mesmo na mascota... non se nos escapa unha!

Debuxamos e coloreamos MOLIS con camiseta verde e pantalón azul, MOLIS con paracaídas e con mochila, MOLIS cuns flequillos de punta multicolor: azul, vermello, amarelo... en definitiva, MOLI facendo iso que máis lle gusta… viaxar polo infinito e mais alá!

Indubidablemente, cada vez nos soltamos máis á hora de debuxar e, pouco a pouco, as nosas creacións estanse a convertir en auténticas obras de arte... quedaron uns MOLIS estupendos no corcho central da aula!

Ademais de todas estas actividades, e sen esquecer que durante a xornada temos tempo para facer de todo, MOLI tamén xoga un papel importante en diferentes momentos do día: no momento da asemblea matinal e do conto, no momento do xogo libre e/ou dirixido nos rincóns, no momento do tempo de lecer… o compañeiro perfecto para cada ocasión!

Ssschhh!!... Sabede que en todos eses lugares que visitaremos con MOLI nas súas viaxes se ocultan fantásticos tesouros que están a agardar a nosa chegada, sen esquecer, que axiña MOLI se converterá nunha máis da nosa familia... comezamos a aventura!!... preparados?

Un saúdo con sabor a pulpo SANFROILANCEIRO e non esquezades que... o noso blogue se alimentará dos vosos comentarios!

COMEZAMOS!!...

E tras a intensa semana de festas,... de novo xa no cole! Menuda primeira semana de sorpresas e novidades!, comezaremos polo principio...

En primeiro lugar, e como non podía ser doutro xeito, as nosas festas, as nosas súper-festas, supuxeron interesantes conversas acerca de cales son os nosos gustos e preferencias: o gusano, o dragón, o saltamontes, os patos... e así o expresamos nuns debuxos cos que revivimos unhas festas que resultaron tan intensamente vividas...

Xa para comezar, e como se fose o primeiro día no cole dos maiores, sentados na zona da asemblea lembramos algunhas das normas e rutinas establecidas o curso pasado, ao tempo que introducimos algunha nova.

Así pois, á rutina da elección do súper-encargado e de actividades varias  vencelladas coa lóxica-matemática e a lecto-escritura, engadimos novas tarefas: a data, os meses do ano, a estación... axudándonos de sendos paneis incluídos xa no panel de rutinas que preside a zona da asemblea. En forma de globo multicolor, cada día buscaremos a data co día, número e mes para cada caso e o pictograma correspondente a cada estación... quedaron xeniais!

Asemade, durante a semana, levamos a cabo as nosas primeiras actividades impresas que lle serven ao profe para realizar unha primeira avaliación inicial acerca daquilo que lembramos e do que non, e así poder actuar en consecuencia durante as vindeiras semanas.

Esta semana centrámonos especialmente na lóxica-matemática: rodeamos, tachamos, trazamos números e letras, coloreamos... Os resultados non defraudaron, non estiveron mal, pero podemos facelo moito mellor... Paciencia, xa que pouco a pouco... voltaremos a ser os de antes!

E falando de lóxica e de matemáticas, sabedes que á parrilla de rincóns do curso pasado engadimos un novo?... Pois si, o rincón de puzzles e crebacabezas, que contribuirá ao desenvolvemento da competencia matemática, ao tempo que nos iniciamos en xogos de mesa como o dominó.

Ademais, tamén como novidade para este curso, agora seremos nós os encargados de arquivar a ficha en cadanseu arquivador.

Para iso, identificado o nome na tarxeta, debemos coller ao xeito a ficha para que o nome quede arriba e no borde da bandexa... parece doado, non si?.. pero alomenos de momento, a máis dun lle está custando un mundo... uf!

Tamén durante esta semana creamos unha fantástica bolboreta: a bolboreta MARIETA.

A bolboreta MARIETA substituirá ao caracol RAMÓN que crearamos en 3 anos e nos lembrará cada día da semana o especialista e o menú da merenda establecido segundo o caso, todo ben organizado,... estupendo!

Non pensedes que durante esta primeira semana de cole foi todo traballar, pois o tempo adicado á celebración dos aniversarios tamén tivo cabida, e XOEL e XIMENA, entusiasmados coa súa coroa de cumpreañeiros, sopraron as velas e cantaron a canción dos 4 anos!... Moitos parabéns!...

Para ser a nosa primeira semana de cole, non estivo nada, pero que nada mal... este cole si que mola!

Un saúdo e non esquezades que... o noso blogue se alimentará dos vosos comentarios!

XUNTOS DE NOVO!!

Siii, esta semana comezou o cole e, aínda que pasaron xa máis de dous meses dende que moitos nos vimos por última vez, parece que foi onte cando rematou o cole... como pasa o tempo, xa estamos de novo co mandilón!

Así pois, ao principio algúns de nós estabamos con vergoña, si, si,... con vergoña!, menos mal que, xa na clase, e transcurridos uns minutiños, voltamos a ser os de sempre...

Estabamos contentos, nerviosos, ilusionados... raros!, o profe notounos maiores, moi maiores, unha proba evidente do paso do tempo e do noso proceso de desenvolvemento... xa estamos na clase de 4 ANOS!

Sentados en cadanseu sitio da asemblea, comezamos unha conversa das nosas vacacións de verán... canto tiñamos que contar! Tardes na praia, na piscina ou no parque xogando aos nosos xogos preferidos, outros disfrutamos do campamento urbán da nosa vila, tamén viaxes en avión a lugares fantásticos... e unha longa lista de actividades que nos serviron para cargar as pilas para este curso que comeza... xa estamos na clase de 4 anos!

Como non podía ser doutro xeito, e como preludio ao “chupitaso” das festas da Guadalupe, as atraccións dispostas preto do auditorio suscitaron sempre comentarios sorprendentes, pois varios de nós, nun ataque total de valentía, afirmamos convencidísimos que montariamos no “saltamontes”... mi madriña! Todo isto ao tempo que escoitabamos durante a mañá bombas que anunciaban que Rianxo estaba de festa... de festa rachada!

Logo da asemblea, descubrimos algunhas das novidades máis significativas da aula, e claro, por máis que buscamos e rebuscamos a NUBA, non a atopamos por ningures, no seu lugar está un personaxe de flequillo de punta multicolor: MOLI será a nosa nova mascota!

Xa o venres, co mandilón posto, comezamos algunhas das rutinas que desenvolveremos ao longo do curso; algunhas de sobra coñecidas -como o ritual do saúdo ou a elección do súper-encargado-, outras novas -como a rutina dos meses do ano, a elección diaria dos coordinadores de equipo ou a escrita de palabras e/ou pequenos textos significativos-. NICOLÁS, aínda que un chisquiño nervioso por facelo todo ben, estivo fantástico, e entre todos escribimos a serie numérica ata o número 11... case nada!

Uf!, que sorpresa levou o profe cos debuxos das nosas vacacións: soles, nubes, ondiñas no mar e area, moooita area nuns primeiros traballiños que non quedaron nada mal para ser a primeira semana de volta ás aulas... moitos, moitísimos parabéns! Uns esquemas corporais xa de súper-maiores!...

E como colofón a un día tan froitífero no que a normas, hábitos e traballo persoal se refire... xogo libre nos rincones dispostos na aula, cadaquén no seu rincón favorito e ata o profe nos deixou cambiar tantas veces como quixeramos... menudo premio!

Agora xa, toca disfrutar das festas da nosa vila. A Guadalupe abofé traerá situacións curiosas que axiña compartiremos na escola... boas festas a todos e todas!

Un saúdo e non esquezades que... o noso blogue se alimentará dos vosos comentarios!

TIC-TAC, TIC-TAC...

Logo dunhas merecidas vacacións de verán, voltaremos a vernos de novo o vindeiro xoves 10 de setembro (de 11:00h. a 12:00h.) e, aínda que a moitos de nós custaranos coller de novo os hábitos e o ritmo de traballo acadados ao longo do curso pasado, quen máis e quen menos seguro que está desexando atoparse de novo na escola co mandilón posto... non si?...

Este curso non se trata dun curso máis... nooon!!, xa non somos os máis pequerrechos e pequerrechas do cole, así que deberemos dar exemplo aos nenos e nenas de 3 anos que comezan a súa andaina no cole dos maiores. Así, ao ser xa os nenos e nenas de 4 anos, intentaremos non chorar nas entradas, portarnos xenial en cada momento da xornada, facer o noso traballo cotián o mellor posible... etc

Notaredes que vimos con moitas moitiiísimas ganas, sabedores de que como non podía ser doutro xeito, as nosas familias estarán sempre ao noso carón felicitándonos polos éxitos acadados e alentándonos a intentalo unha e outra vez ata conseguilos... mil millóns de grazas familias!

Así pois, un curso máis, e a medida que avance o calendario escolar, iranse sucedendo as distintas actividades e conmemoracións que marcan o curso e o ritmo da nosa aula: as cabazas do Samaín e as castañas do magosto, compartiremos soños e ilusións no Nadal, as máscaras e disfraces do Antroido... e moitos máis pequenos-grandes acontecementos que vos iremos contando no noso blogue; un blogue que con esta entrada dá por inaugurado oficialmente o curso académico 2015-2016... preparados?

Un saúdo e non esquezades que... o noso blogue se alimentará dos vosos comentarios!

É TEMPO DE VERÁN!!

Tras unha andadura chea de vivencias, experiencias, descubrimentos e aprendizaxes, chega o final do curso co inicio do verán... é tempo de VERÁN!

O verán é un período vacacional, e resulta importante disfrutar del como tal; nembargantes, as familias debedes ter en conta que calquera xogo ou actividade cotiá pode adquirir certo trasfondo pedagóxico.

Por iso, ademais de xogar, ir á praia, ao parque, de viaxe visitar novos lugares... é importante, sempre que sexa posible e se estime oportuno, realizar tarefas que sirvan de medio para consolidar algunhas das capacidades adquiridas ao longo do curso. Non se trata de facer fichas como as da escola, senón de non perder o hábito e a actitude de traballo.

Dende un enfoque lúdico, ameno e divertido, poderemos desenvolver distintas actividades, non como unha obriga, senón como unha rutina que levamos a cabo día a día durante as nosas tan merecidas vacacións.

Respeto á lecto-escritura, sinalar que un lector non nace, faise, para iso, as familias debedes transmitirnos o valor da lectura como unha fonte de aproximación a novos coñecementos e como unha porta aberta ao mundo da fantasía.

Destacar o importante que resulta que non nos iniciedes no proceso lector, xa que moitas veces, inconscientemente, xerádesnos frustracións e angustias innecesarias cara unha aprendizaxe custosa á que lle prestaremos especial atención o vindeiro curso, paciencia...

Resulta esencial que nos sintamos motivados de cara a proposta de actividades, pois só deste modo, gañaremos confianza nas nosas posibilidades, seguridade... actitudes que nos levarán a incrementar progresivamente o noso afán de superación e así facer sempre as tarefas propostas do mellor xeito posible.

Entre outras das posibles actividades que podemos levar a cabo durante estas vacacións, primando sempre o periodo vacacional e de descanso característico destes meses, estarían:

·     identificación e trazado de grafemas. Non nos poñades letras para copiar,... iso está chupao! agora xa somos maiores e deberiamos saber trazar as letras seguindo o ditado de grafemas... facemos a proba?

·     recoñecemento e, moi especialmente trazado dos números do 0 ao 3, a algún de nós todavía se nos resiste a identificación e grafía dos números traballados sistematicamente durante o curso... coa vosa axuda o lograremos, estamos convencidos!,

·     seguir traballando as cores, os trazos e as formas planas (círculo, cadrado, triángulo), aprendendo a identificalas en elementos do contorno,

·   tampouco deberemos esquecernos da expresión plástica, así que deixade que nos expresemos artisticamente e de xeito libre,... sen modelos!. Non esquezades que é máis importante o proceso que o produto, xa que este dependerá do noso grao madurativo e da nosa particular visión do mundo. Agora ben, lembrade que... non todo vale!,

Todo isto sen esquecer de disfrutar ao máximo as tan merecidas vacacións que acabamos de comezar, aproveitando estes meses para recargar as pilas para todos os retos e actividades que nos agardan a partir de setembro...

OS NENOS E NENAS DE 3 ANOS B,

DESÉXANVOS UNHAS MOI FELICES VACACIÓNS DE VERÁN!!