COMEZAMOS DICINDO... BOS DÍAS!!!

Tras a semana grande de festas da nosa vila na honra da Virxe de Guadalupe, agora si que si podemos dicir que comezou o cole e, logo de disfrutar dunha semana extra de vacacións, estes días aproveitamos para lembrar algunhas das normas e rutinas que rexen a vida da nosa aula; despois de tanto tempo algunhas estaban xa case esquecidas.
Asemade, esta semana comezamos introducindo progresivamente algunha rutina nova, especialmente no momento da asemblea... si señor, unha asemblea totalmente de súper-maiores!

Así que estade moi atentos e silenzo que, a través do noso blogue farémosvos partícipes do que faremos cada día nas asembleas matinais de súper-maiores...

Comezamos coa posta e abotoado correcto do mandilón. Aquí, xa se apreciaron algúns que outros problemas, especialmente os primeiros días nos que non atopabamos as mangas, os ollais... e ata algún de nós puxo o mandilón a modo de carapuchiña vermella como cando estabamos en 3 anos!

Xa logo, na liña vermella, damos os “bos días” ao resto de compañeiros e compañeiras e ao profe, e para ir espertando, cantamos a canción dos “Buenos Días”.

Como dato anecdótico, este curso chamounos á atención a liña vermella. Trátase dunha liña vermella máis longa que nunca, xa que o panel de rutinas mudou de sitio e a partir de agora estará situado enriba dos percheiros. Máis adiante, explicarémosvos que haberá moi pronto no lugar da “outra asemblea”.

Antes de nomear o súper-encargado, o profe designa os “coordinadores de equipo”, cuxa misión é a de coller e recoller os estuches e os botes dos rotuladores, así como de repartir os libros prestando moooita atención aos nomes para non equivocarse, especialmente neste curso no que todo estará escrito en letra enlazada... paciencia...

Pero sen lugar a dúbidas, o verdadeiro protagonista da  asemblea é o súper-encargado.

Son múltiples e variadas as funcións do súper-encargado:

• elixe a pegatina para que o mandilón do profe esté ben bonito,

• realiza a fichaxe de ausencias e presenzas dos nenos e das nenas e fai o reconto final,
• este curso seguiremos coa realización de sumas cada vez máis difíciles, e iniciarémonos na realización de restas... uf!, isto si que nos vai a custar...
• logo escribe o seu nome e apelidos, así como tamén o nome da mascota (ARIS) e outras palabras que resulten sinxelas. O profe explicounos que de momento seguiremos escribindo en letra maiúscula, ata que collamos a soltura suficiente no trazo da letra enlazada en pauta... polo momento que non cunda o pánico,... tranquilidade!
• tamén escribe as letras do abecedario que o resto de compañeiros e compañeiras van ditando, os números, -este curso iremos un pouquiño máis aló do número 9-,

• realiza a constatación do tempo atmosférico e consigna os resultados no panel do coello espacial,

• cantamos e mimamos a archi-coñecida canción de “Los días de la semana” e recitamos un a un os 12 meses do ano tomando como referencia os vagóns do tren dos aniversarios,
• elixe que neno ou nena irá de primeiro na fila de comedor...

Como privilexio, neste curso, no momento destinado ao xogo libre nos rincóns, o súper-encargado xogará ao ordenador cos xogos interactivos de ARIS.

Na asemblea, ademais de todas estas tarefas, entre todos e todas contamos dende o número 1 “hasta el infinito y más allá” dependendo do día, logo, un de nós sae a escribir no encerado o número ata o que chegamos cada día.

Como colofón final, o profe organiza a xornada de cada día: explica que actividade ou actividades levaremos a cabo, os especialistas...

Todas estas son as tarefas que, de xeito sistemático e cotiá, levaremos a cabo durante este curso no momento da asemblea, nalgúns casos acompañadas de cancións que nos lembran o inicio ou remate dunha actividade.

Pero é que durante esta semana, tamén levamos a cabo as nosas primeiras actividades impresas que lle serven ao profe para realizar unha avaliación inicial acerca dos nosos coñecementos, acerca das nosas aprendizaxes, daquilo que lembramos e do que non... e así poder actuar en consecuencia durante as vindeiras semanas.

As actividades impresas destes días, deixaron en evidencia que tooodo este tempo de vacacións fixo estragos e máis dun non se lembra como se traza seguindo a direccionalidade correcta o número..., lle faltan letras ao seu nome cando nos toca escribilo nas fichas, e mesmo voltamos a colorear como cando estabamos en 3 anos... Tranquiiilos, non pasa nada, son os primeiros días tras a volta das vacacións de verán e axiña voltaremos a ser os de sempre... súper-incribles!

Un saúdo e non esquezades que... o noso blog se alimentará dos vosos comentarios!

ESTE COLE SI QUE MOLA!

Siii, hoxe comezou de novo o cole tras as vacacións de verán e, aínda que pasaron xa máis de dous meses dende que moitos nos vimos por última vez, parece que foi onte cando rematou o cole... como pasa o tempo, xa estamos de novo co mandilón!

Estabamos nerviosos, ilusionados e algúns de nós ata con vergoña, si, si, menos mal que, xa na clase, e transcurridos uns minutos, todos e todas volvimos a ser os “nenos e nenas do profe” aos que se suma un novo amiguiño: Jhon Michael. Benvido, xuntos pasarémolo fenomenal!

O primeiro día, o día da presentación, quen máis e quen menos lembraba cal era o seu sitio na liña vermella da asemblea. Non resultou tan doado descubrir cal sería o noso novo sitio nas mesas de cada equipo de traballo.

Para este curso, o profe organizounos de novo en 4 equipos: o Equipo do “M”, do “P”, do “L” e do “S”. Deste xeito, e mediante unha dinámica sinxela de movemento ao son do pandeiro, coñecimos cal será o noso sitio ao longo deste curso e con quen compartiremos diariamente as actividades e o traballo individual.

O certo é que ninguén amosou reticencias a cambiar de mesa de traballo e de compañeiros... velaí van os equipos deste curso!

No Equipo do “M” estarán Froilán, Daniela, Unai, Diego, Tania e Xiana X..

No Equipo do “P” estarán Carla V. e Carla S., Roi e Sergio. e no Equipo do “L”: Leo, Andrea, Luis Miguel e Nerea.

Finalmente, noutra das mesas grandes estará o Equipo do “S” formado por Lois, Mencía, Rodrigo, Lucía, Álvaro e Jhon Michael.

Logo disto, e ao tratarse o día da presentación dun día diferente tamén no que a horario se refire, adicámonos a poñernos ao día e facer partícipes ao resto de compañeiros e compañeiras e ao profe de todas as vivencias que, dalgunha maneira, marcaron as nosas vacacións.

Algúns fomos á praia e ao parque case tódolos días e nada máis e nada menos que ata que se facía de noite, outros coñecimos montes con cabalos grandes e cabalos pequenos, tamén os hai que foron a un hotel cunhas inmensas piscinas e subiron a tobogáns enormes... guaaau!

Sen lugar a dúbidas, resultaron unhas vacacións escandalosamente divertidas...

... DE VIAXE EN TREN!

... NA PRAIA DE TANXIL!

... NO PARQUE DA TIROLINA!

... NA PISCINA DOS TOBOGÁNS!

Asemade, durante estes días tamén reservamos un anaquiño de tempo para coñecer á nosa nova mascota, ARIS. Xunto a ela, comezamos a adentrarnos nun lugar onde se custodian os bos desexos, as palabras amables e os soños doces... NUBARIS!

Do mesmo xeito, e para que as nosas familias vaian organizando a parrilla de clase de cada día, este curso voltamos a elaborar un horario semanal no que figura o menú da merenda e o especialista ou especialistas que temos cada día. Nesta ocasión, cambiamos o caracol Ramón de 4 anos, por unha actividade impresa un pouco máis sofisticada... o moucho Pascual! (dun ou doutro xeito Pascuala seguirá presente no noso día a día)

Traballamos como auténticos súper-maiores, coloreamos o moucho sen deixar ocos e case case sen saírnos do contorno. Logo, veu o máis complicado, colocar a roda co horario e calendario na parte central do moucho cun encuadernador que xiraremos dependendo no día da semana no que nos atopemos.

Agora si que si, todo baixo control, e non teremos excusa para non traer a roupa e o calzado axeitado os días que temos Psicomotricidade ou para non cumprir co menú establecido para cada día da semana... unha idea estupenda!

Para ser a os nosos primeiros días de cole como súper-maiores do noso corredor, non estiveron nada, pero que nada mal... este cole si que mola!

Un saúdo e non esquezades que... o noso blog se alimentará dos vosos comentarios!

PREPARAAADOS, LIIISTOS... XAAA!!!

Logo dunhas longas e merecidas vacacións de verán voltaremos a vernos de novo o próximo mércores 11 de setembro (de 11:00h. a 12:00h.) e, aínda que seguramente a moitos de nós custaranos coller de novo os hábitos e o ritmo de traballo acadados ao longo do pasado curso, quen máis e quen menos abofé está desexando atoparse de novo cos compañeiros e compañeiras, coñecer en que equipo de traballo estaremos e en que mesa nos sentaremos, a ARIS, a nosa nova mascota,...

Este curso será moi importante para todos nós... buf!, convertémonos nada máis e nada menos que nos súper-maiores de mandilón, seremos os súper-maiores de Educación Infantil, e como tales, deberemos dar exemplo aos máis pequerrechos e pequerrechas, aos nenos e nenas de 3 anos que comezan esta etapa que tan froitífera está resultando para moitos de nós e para moitas das nosas familias.

Un curso máis, e a medida que avance o calendario escolar, iranse sucedendo as distintas actividades e conmemoracións que marcan o ano e o ritmo da nosa aula: as cabazas terrorificamente divertidas do Samaín e as deliciosas castañas do magosto, compartiremos soños e ilusións coa chegada do Nadal, mergullarémonos na fantasía do Antroido... e mil millóns de acontecementos que vos iremos contando no noso blog; un blog que con esta entrada da por inaugurado oficialmente o curso académico 2013-2014, o curso no que nos despediremos como se merece do mandilón...

Mmmm!!... Curso 2013-2014!... Prometémosvos que será o curso máis especial... un curso cargadiño de mil e unha fazaña, de mil e un reto... contamos convosco, familias!...

Un saúdo e non esquezades que... o noso blog se alimentará dos vosos comentarios!

CONTÁXIATE DE DIVERSIÓN...

Cun chisquiño de retraso, non podedes imaxinar todas as cousas que nos quedaron por contarvos do noso fin de curso… xa criades que nos esqueceramos, non?...

Esta última semana de curso resultou intensa, moooi intensa, pero non no que a traballo se refire… nooon!  Resultou intensamente divertida e xenial, vivindo días fora do cotiá que convertiron esta semana no mellor colofón a un curso repleto de mil millóns de experiencias, actividades e vivencias que seguen axudándonos a facernos cada vez máis e máis súper-maiores…

Así, comezamos a semana o LUNS, pechando algunhas das actividades impresas “de archivar” que quedaban pendentes. Eran actividades impresas, “fichas”, sinxelas, que nos servían para consolidar aprendizaxes vencelladas coa lóxica-matemática e a lecto-escritura… Os resultados?... Moi mellorables nalgúns casos, e é que o cansancio de todo o curso estaba máis que patente en máis dun de nós e no colexio xa olía a vacacións…

O MARTES, acudimos ao Auditorio Municipal de Rianxo. Ese día, contounos o profe que pasara algo insólito e inesperado, un tren cargado de ilusión, música, festa, baile e xogos parara no auditorio da nosa vila. Este tren chámase MARÍA FUMASA e leva percorrendo o mundo unha morea de anos, cargado de historias divertidas para que cantemos e bailemos e así ser todos e todas moito máis felices.

MARÍA FUMASA (Edit. Galaxia)

Xa no auditorio, coñecimos á Bruxa Maruxa e mailo ao seu axudante que non pararon de cantaruxar.

Un concerto didáctico que nos ofreceu a oportunidade para sentir máis, para rir, bailar e cantar. E de premio?... A Editorial Galaxia agasallounos cun dos seus contos: Mola que chova, De cores e de amores, Sabeliña e os ratos e Flis-fli-ris-flás… fantástico!

O MÉRCORES, e como non podía ser doutro xeito sempre ollando para o ceo que apuntaba choiva, logo da asemblea matinal baixamos de picnic a un dos parques máis concurridos de Rianxo: ao parque da tirolina. Alí corrimos, saltamos, rodamos, trepamos e… merendamos! Non sabedes o ilusionados que iamos coa nosa bolsiña de picnic…

E o XOVES?... Siii, a súper-festa que un curso máis nos tiña preparada o profe, cunha merenda ben diferente ao do resto do curso con snacks diversos e para beber zumes, batidos, bebidas isotónicas…

Encantadores e sempre estupendas coa coroa con motivos do fondo mariño que elaboraramos días atrás; comimos, xogamos cos pompeiros que varios compañeiros e compañeiras trouxeran e… movemos o esquelete coas últimas novidades musicais do momento… canto artista reunido por metro cadrado, sen palabras!

Asemade, este mesmo día tamén celebramos o aniversario de ROI cun biscoito elaborado para a ocasión… agora só quedan XIANA X., TANIA, DIEGO e LOIS na tarta de 4 anos!

Foi un aniversario especial, xa que tivemos a visita dunha animadora de sobra coñecida por todos e todas que nos deseñou uns animais divertidos nada máis e nada menos que con globos de diferentes formas, tamaños e cores… cans, serpes, flores, espadas -de broma-… para todos os gustos! E como nos portamos?... Peor que os nenos e nenas de 3 anos,… que vergoña!, sentímolo profe…

Xa o VENRES, un curso máis os profes do cole organizaron a “Festa da Auga”, xogos divertidos cuxo elemento motivador era a auga. Había o xogo do vaso na cabeza, o dos camareiros, o relevo de esponxas, as piñatas con sorpresa…

Pero dentro de tanta diversión, o realmente máis divertido, o “chirigingueitor” organizado para media mañá, suspendeuse por mor do tempo que naquel preciso momento non acompañaba para mollarnos dos pés á cabeza… que mágoa!

Provistos das nosas ultra-modernas pistolas de auga quedamos un tanto desencantados…

Un desencanto que nada máis chegar á clase deixamos atrás. Voltamos a merendar cos snacks e biscoito sobrante do día anterior e… quen se lembraba do “chiringueitor”?,… cando ademais o venres pasado, grazas a uns bombeiros re-saladísimos vivimos unha festa da escuma  improvisada na que tanto nenos e nenas como profes acabamos… em-pa-pa-dos!

Agora xa, e despois dun curso tan intenso, tócanos disfrutar destas merecidísimas vacacións. Teremos tempo para ir á praia, á piscina, ao parque, a festas varias e, por suposto, os máis afortunados, a visitar novos lugares… intentando reservar un anaquiño de tempo para traballar todo o que aprendimos ao longo do curso, que senón en setembro… 

"ESPEJITO ESPEJITO MÁGICO"

A piques de que remate o curso e de comezar as tan merecidas e necesarias vacacións para máis dun, esta semana seguimos pechando actividades traballando na nosa aportación á revista do cole: “Ondiñas veñen”.

Como sabedes, as seccións e temáticas que integran a nosa revista escolar son para todos os gustos e públicos, dende traballos sobre as distintas celebracións que teñen lugar no cole tales como o samaín, o magosto ou o nadal, ata entrevistas, pasatempos e mesmo contos protagonizados por seres fantásticos e marabillosos.

Este curso, decidimos partir dunha das rutinas e tarefas cotiás que desenvolve o súper-encargado cada día: a elección do accesorio para o mandilón do profe. Máis concretamente, partimos da pegatina de Blancanieves á que asignamos un rito a modo de interrogación retórica… “Espejito, espejito mágico,… ¿quién es la más bella del cole?”...

Aquí, todos e todas respondemos co nome da súper-encargada. Si, si… súper-encargada, porque alomenos de momento son contados os nenos que se atreven a elexir esta pegatina… é de chicas!

A partir deste rito cotiá e do conto de “Blancanieves y los 7 enanitos” dos irmáns Grimm -conto que inexplicablemente moitos de nós descoñeciamos-, presentamos para a revista do cole un divertido xogo cun espelliño máxico co que teredes que deixar voar a vosa imaxinación…

- BLANCANIEVES Y LOS SIETE ENANITOS -

Na actividade, presentamos 6 fotografías dunhas nenas e dun neno de sobra coñecidos por todos e todas.

Nembargantes, e para axudarvos a resolver a identidade misteriosa que se agocha en cada fotografía, decidimos acompañar o traballo dun debuxo e dunha rima sinxela en forma de adiviña na que resaltamos algunhas cualidades dos enigmáticos personaxes de cada imaxe.

A nós custounos un chisquiño, pero logo de que o profe nos dese algunha que outra pista, está claro… trátase nada máis e nada menos que… da profe Divina, Karina, Belén, Marta, Gemma e J.Ricardo… os nosos profes!

Entusiasmados coa actividade fixemos unha morea de debuxos de cada profe aos que non lles faltaron detalle… fantásticos!

Xa logo, reunidos na asemblea escollimos os que máis graza nos fixeron, aqueles que máis nos chamaron a atención, deixando os restantes para unha composición de grupo-clase coa que decidimos decorar o noso corcho do corredor.

 



Por outra banda, o momento da composición das adiviñas supuxo un encontro sempre gozoso co mundo da creación literaria e coa lecto-escritura. Así, coa axuda do profe, creamos unhas adiviñas ben doadas que agardamos vos axuden a descubrir de que profe se trata en cada espelliño máxico.

Porque todos algún día fostes nenos e nenas, nunca deberiades de deixar de ver as cousas do voso día a día cos ollos da imaxinación e da fantasía…Seredes quen de resolver os 6 enigmas que se agochan en cada espelliño máxico?…

Agora, acompañádenos na conta atrás para poñer o punto e final a este curso 2012-2013. Será unha conta atrás cargadiña cargadiña de diversión, nervios, actividades e sorpresas, moooitas sorpresas…

E para o vindeiro curso?... Buf, a nosa despedida do mandilón… como pasa o tempo, xa seremos os súper-maiores de mandilón!...

Un saúdo e non esquezades que… o noso blog se alimentará dos vosos comentarios!

PASCUALA... PASA PASARELA!

Olaaa, estou moooi feliz porque hoxe, a dúas semanas de rematar o cole, por fin me deixaron facerme cargo da entrada semanal do noso blog… 

Nesta ocasión, non serán os nenos e nenas de 4 ANOS B os que vos conten como foi a semana na clase, non, esta vez, por tratarse dunha entrada un tanto especial, deixáronme que fose eu a encargada de despedirme do blog, das familias e dos nenos e nenas cos que vivín un curso estupendo repleto de momentos intensos e divertidos, moooi divertidos…

Como… que aínda non sabedes quen son?... Son eu, a rá Pascuala, que marcha para a clase doutros nenos e nenas de 4 ANOS, xa que as “SONRISAS Y MANDILONES” do profe J.Ricardo para o vindeiro curso convertiranse nos súper-maiores de mandilón e como tales, cambian de mascota, nada máis e nada menos que unha das primeiras compañeiras de mandilón do profe, ARIS, coa que vos adentraredes nunha nova dimensión, na Dimensión Nubaris… estades preparados?

Foron miles os momentos vividos ao longo do curso: xuntos xogamos, lemos, traballamos, debuxamos, bailamos e, sobre todo… aprendemos! Buf, canto aprendemos!

Xuntos aprendemos a sumar e a ler a partir de palabras e textos significativos, xuntos tamén aprendemos a identificar algúns dos cambios que se producen no contorno e na vida das persoas coa chegada de cada estación, xuntos aprendemos a ilusionarnos coa maxia do Nadal e a visita das SS.MM. os Reis Magos de Oriente, xuntos aprendemos a recoñecer os elementos representativos do antroido convertíndonos en encantadores príncipes e marabillosas princesas…

Agora xa, e aproveitando a chegada inminente deste verán que parece que non quere vir, aproveitamos para coñecer elementos do tesouro que agocha o fondo mariño. Coñecimos as baleas, golfiños, polbos, peixes de todas as cores, e ata a Bríxida, unha sereíña coa que conseguimos salvar un home e o seu fillo que caeran ao mar… menuda aventura!

A partir desta aventura no mar, descubrimos que a auga dos ríos sempre se move porque ten corrente, así coma o nome dalgún río coma o Nilo, que se atopa en Exipto e está cheo de crocodilos, ou o Misisipi, que é un dos ríos máis grandes do mundo.

Sen lugar a dúbidas, se me teño que quedar co que máis me gustou da miña estancia no cole, foi convertirme semanalmente na convidada especial de cada familia... cantos sitios novos coñecín!... Fun a un centro comercial, a festas de aniversarios onde había máis nenos e nenas, a happy parks... ata me levaron de viaxe en tren ata Vilagarcía!

O anfitrión semanal explicaba na asemblea todos os lugares visitados e todas as actividades que fixera durante esa semana de estancia na súa casa ou piso. Incluso, varios nenos e nenas presentáronme novos amiguiños e amiguiños que, en forma de boneco de peluche, servíronnos para dar renda solta á nosa fantasía: Pascual e Pascualiño, o esquío Roni, Pingüi, o oso panda Wiki, Nutriart, Branco e Negro... canta imaxinación hai nesta clase!

Ademais, e por si todo isto fose pouco, puxéronme máis guapa que nunca confeccionándome diversos complementos. Vamos, que estou feita unha súper-modelo,... un look para cada ocasión, sempre son a sensación!

PASCUALA SÚPER-SPORT!

PASCUALA SÚPER-COCIÑEIRA!

PASCUALA SÚPER-MODELO!

Agora, máis que nunca, e convertida nunha auténtica súper-modelo, sempre se presenta algún candidato ou candidata para debuxarme cos ollos da imaxinación. Preciosa e estupenda me ven estes nenos e nenas...

Por todo isto, gustaríame dar mil millóns de grazas ás familias pola vosa implicación na actividade “Pascuala vén á casa” proposta polo profe, xa que non sempre é doado conciliar a vida laboral cos traballiños que se propoñen dende a nosa aula e dende o cole, -que non son poucos-. Coa vosa guía e supervisión quedou unha compilación de traballos e fotografías fantástica que axiña decidimos integrar no rincón de biblioteca e que ollamos unha e outra vez sen aburrirnos nin un chisquiño...

Estes días estou un pouco triste porque axiña remata o cole e teño que marchar, pero... imos de vacacións e son moitas as sorpresas que nos agardan durante as vindeiras semanas. Como non podía ser doutro xeito, xuntos, poñeremos o punto e final a este curso, así que seguide moi atentos ás novas do noso blog e... contáxiate de diversión!

Un saúdo e non esquezades que... o noso blog se alimentará dos vosos comentarios! 

POR TERRA, MAR E AIRE...

Xa vos contaramos a estupenda viaxe que fixeran  Pascuala, Fernando e Rosalía montados nunha fregona voadora. Fora unha viaxe fantástica na que aproveitamos para observar e identificar características, hábitats e coidados necesarios dos animais.

Deste xeito, e tendo máis ou menos claras as diferenzas entre os animais domésticos e os animais salvaxes e entre a selva e sabana, estes días traballamos, servíndonos de novo da viaxe de Pascuala como alicerce, algúns medios de transporte e algúns medios de comunicación.

Para comezar, a partir da lectura do conto da unidade: “Voando á selva”, observamos os vehículos que aparecían no seu relato argumental establecendo diferenzas entre eles en canto ao seu tamaño, capacidade, forma, rapidez…

Asemade, nas asembleas matinais falamos sobre diferentes medios de transporte e o medio físico polo que se desprazan.

Nestas conversas dirixidas saíron moitos e variados medios de transporte; dende os máis tradicionais como o coche, o camión ou o autobús, ata os máis ultra-modernos como as motos acuáticas, os platillos volantes e os cohetes espaciais.

Tamén realizamos descricións dalgúns vehículos nomeados, conversando sobre a súa utilidade: viaxar, desprazarnos a lugares que están lonxe, transportar mercancías…

Pero sen lugar a dúbidas, parte das conversas suscitadas xiraron moi especialmente arredor dos medios de transporte que se desprazan polo aire: avións, globos, helicópteros, ala delta, parapentes, paracaídas… ocupando un lugar privilexiado os platillos volantes, os cohetes e naves espaciais, pois xa dende principio de curso, son diversos os deseños realizados destes medios de transporte no momento do debuxo libre… espectaculares!

Por iso, e como non podía ser doutro xeito, todos estes coñecementos e aprendizaxes pasámolos unha vez máis ao papel en forma duns debuxos nos que cada vez amosamos máis seguridade e confianza: camións, barcos, submarinos e… ata un coche descapotable!

Todo este traballo, levámolo a cabo de forma máis ou menos ordeada, levantando a man e gardando a quenda para falar. Uf, isto si que é complicado!... é que ultimamente temos a todas horas unhas ganas de falar alucinantes!...

Este novo centro de interese ademais, posibilitou o traballo transversal de elementos vencellados coa Educación Vial, insistindo na necesidade de respectar as normas de circulación viaria, co obxecto de previr accidentes.

Tamén lembramos o importante que resulta camiñar polas beirarrúas, utilizar os pasos de peóns ou semáforos para cruzar e mirar antes de facelo. Así como non molestar a papá ou mamá cando van conducindo, levar abrochado o cinto de seguridade e, aínda que sexamos maiores, ir sempre ben sentadiños na nosa silla do coche.

Agora que xa somos uns pequenos-grandes expertos nos medios de transporte e que falta moi pouquiño para que cheguen as vacacións de verán, non estaría nada mal que decidiramos que medio de transporte empregaremos nestas vacacións… por terra, mar ou aire?...

Un saúdo e non esquezades que... o noso blog se alimentará dos vosos comentarios!