UN MUSEO NO XARDÍN.

Sabedes que Pascuala gardou hai tempo a bufanda, o gorro e os guantes ata o ano que vén?... Pois si, porque xa case non vai frío. Estamos en primavera!... 

Desta maneira, as modificacións que se producen no contorno físico e natural e na vida das persoas coa chegada da nova estación, suscitaron diversas actividades que nos serviron para observar e identificar algúns dos elementos máis representativos da primavera: saen as flores, as follas das árbores son de cor verde, xa non vimos ao cole  tan abrigados coma no inverno...

A través do conto da unidade didáctica: “Un museo no xardín”, descubrimos como Pascuala, Fernando e Rosalía constrúen o “museo bicheiro" no xardín da súa casa cos debuxos e fotografías que eles mesmos fixeron coa axuda da cámara fotográfica. Acudiron todos os seus amigos e amigas e, incluso, os propios animaliños, que prometeran non picar a ninguén e non comer as verduras da horta.

Comprobamos como bichiños como as FORMIGAS saíron da terra, que outros viñeron voando como as BOLBORETAS, as ABELLAS ou os MOSQUITOS... todo isto traballado de xeito sistemático en diversas actividades de ensinanza-aprendizaxe nas que non podía faltar o debuxo do “museo bicheiro”...

Asemade, o profe propúxonos un torbeliño de ideas no que tiñamos que dicir obxectos, elementos, situacións... relacionadas coa primavera: “XARDINEIRO”, “SOL”, “BOLBORETA”, “ÁRBORE”, “ABELLA”... sempre interesantes achegas que escribimos no encerado e en folios de cores para unha actividade que levariamos a cabo posteriormente.

Outra das actividades desenvoltas foi a decoración dunha flor que debiamos pintar de diferentes cores sen saírnos do contorno. Pero todavía quedaba o máis xenial, xa que na parte central, logo de picala co punzón, pegamos unha fotografía nosa.

Xunto coas nosas flores e coas palabras vencelladas coa primavera que escribiramos en folios de cores, decoramos a porta da clase. Bonita, bonita, quedou a porta da nosa aula vestida nesta ocasión de primavera...

Estas conversas dirixidas e actividades enriquecéronse se cabe todavía máis coa posterior lectura e interpretación da lámina mural desta unidade didáctica na que se podía ver unha paisaxe primaveral con moitos dos elementos que saíran no torbeliño de ideas e, moitos dos personaxes do conto da unidade didáctica, achegándonos ao traballo do xardineiro e do agricultor.

Flores, árbores, bolboretas, paxaros, xardineiros e agricultores... quedaron uns debuxos da primavera estupendos nos que plasmamos todo o que aprendimos co traballo deste centro de interese. 

Por outra banda, como sabedes, na semana do “Día do Libro” os equipos do cole propuxeron unha actividade na que as familias tivestes un peso fundamental. Este curso, mergullados na temática da auga por ser o “Ano Internacional da Cooperación na Esfera da Auga”, propúxose a actividade de convertir unha botella de auga de plástico baleira nun personaxe fantástico que ademais se convertiría en protagonista dunha pequena historia ou conto.

Día a día, nas asembleas matinais iamos coñecendo os personaxes que ilusionadísimos traian os nosos compañeiros e compañeiras... había auténticas obras de arte!

Por iso, a tarde do luns, programouse unha xornada de portas abertas para as familias para que poidésedes ver o noso particular “museo bicheiro”.

Pola nosa conta, aquí vos presentamos a: PINGÜI, EXTRAT, COCORICO, ROSALÍA, GARY, PASCUALA, TIBURO, CHUGGINGTON, PASCUALIÑO, LAURA, AVOA PEPA, ARAÑA “PATASLARGAS”, OSITO GOMINOLA, CHINICHÁN, e mesmo un barco, un avión e unha piscina con tartarugas de plastilina... buf, canta imaxinación!,... fabulosos!

Un saúdo e non esquezades que... o noso blog se alimentará dos vosos comentarios!

QUEN QUERE ATA AS ESTRELAS CHEGAR?...

“Quen quere voar?... Quen quere ata as estrelas chegar?... Quen vai atopar o tesouro?...” con estas e outras preguntas recollidas nun pequeno poema, comezamos a xornada do martes 23 de abril, unha xornada na que conmemoramos o “Día do Libro 2013”.

Sabedes por que se celebra o “Día do Libro” cada 23 de abril?...

Para celebrar o “Día do Libro” escolleuse o 23 de abril por coincidir este día co falecemento de grandes escritores universais tales como: Miguel de Cervantes, Garcilaso de la Vega ou o mesmísimo William Shakespeare.

Aínda que non coñecemos as súas obras, o profe nos explicou que escribiron libros para maiores archicoñecidos en todo o mundo, tan importantes que foron traducidos a diversos idiomas para que a xente poida megullarse nas súas fascinantes historias.

Deste xeito, no ano 1995 a UNESCO promulgou o 23 de abril como “Día Internacional do Libro”, a pesar de que no caso concreto de España xa se viña celebrando dende o ano 1930.

Este día, un curso máis non pasou desapercibido na nosa clase, e dende primeiriña hora da mañá, na rutina da asemblea matinal, descubrimos que o “Equipo de Biblioteca” do cole nos deixara una agasallo en forma de libro.

Así, aos contos da nosa biblioteca de aula que traballamos ao longo deste curso que foron moitos e variados, engadimos un novo: Se eu fose un gato (OQO editora).

Se eu fose un gato é unha proposta divertida, a modo de xogo, que nos permitiu tomar conciencia da realidade (vivencias, emocións, necesidades...) do outro co obxectivo último de entendelo mellor.

SE EU FOSE UN GATO (OQO editora)

Unha vez desvelado o título do conto, nesta ocasión as hipótesis sobre o que se escondía no agasallo resultaron innecesarias, -estaba clarísimo, o agasallo era un conto-, conversamos acerca de cales eran os nosos contos preferidos decatándonos de todos os que coñecemos.

Deste xeito saíron, dende os contos de sempre, os contos de toda a vida como Caperucita Roja, Los 3 cerditos ou El patito feo, ata outros que ultimamente están acadando unha fama considerable nos máis pequenos entre os que atopamos os contos da Editorial Kalandaka con títulos como La casa de la mosca fosca ou A que sabe a lúa? ou mesmo a colección de Pepe Carreira da Editorial A Nosa Terra de Os Bolechas que nos proporcionan un sempre grato primeiro achegamento ao noso contorno físico, natural, social e cultural...

Asemade, tamén destacamos os contos da Colección Serie Azul da Editorial Vicens Vives cos que os derradeiros contacontos do curso nos están deixando sen palabras cos seus primeiros exercicios de prelectura. La vaca bailarina, Verónica el hada buena, Los osos toman el sol... fabulosos!

De todos é coñecido que os contos se convirten en aliados excepcionais nos procesos de ensinanza-aprendizaxe que levamos a cabo na aula. Os contos servennos para atoparnos cos problemas éticos fundamentais favorecendo a adquisición dun primeiro código moral ao mesmo tempo que reforzan virtudes e cualidades como o valor da amizade, a humildade, a exaltación da intelixencia e do enxeño...

Todas estas consideracións e apreciacións persoais, representámolas no tríptico que levamos para a casa no que se explicaban curiosidades acerca do “Día do Libro”, e no que se reservou un espazo para dar renda solta á nosa imaxinación. Deste xeito, cada un de nós, logo da realización do traballo establecido para ese día -a piques xa de rematar o libro número 6 de Pascuala- tivemos que debuxar os nosos personaxes de contos favoritos: princesas, alieníxenas doutra galaxia, vacas e polbos con extraordinarios súper-poderes... estupendos!

Un saúdo acompañados de lectura e non esquezades que... o noso blog se alimentará dos vosos comentarios!

SÚPER-HEROES EN ACCIÓN!!!

 

Por si aínda non o sabiades, o mércores tivemos na nosa aula unha visita moi especial, pois nada máis e nada menos que viñeron… os bombeiros!... Tranquiiilos, que non había lume no cole, nin moito menos, recibimos esta visita para achegarnos ao día a día do seu traballo cotiá: lugar de traballo, instrumentos que empregan, funcións… ao tempo que aprendimos e vivenciamos unhas nocións básicas de seguridade no caso de incendio.

Deste xeito, xa na asemblea matinal, no momento da lectura da frase diaria na que cada día se agocha algo a ter en conta durante a xornada, o profe nos deu algunha pista do que sucedería xusto antes do patio. Así limos, desta vez en castelán: 
“HOY TENDREMOS EN EL AULA UNA VISITA SÚPER-ESPECIAL”…

Bueno, sabedes que non se nos escapa nada, e por iso, rapidamente este segredo foi desvelado por varios compañeiros e compañeiras que, no momento da entrada ao cole, viran os bombeiros, incluso algún deles asegurou que tamén vira o camión dos bombeiros…

Antes da visita, conversamos brevemente acerca do traballo cotiá que realizan os bombeiros, quedando claro que os bombeiros teñen outras moitas funcións ademais de apagar incendios.

No momento da visita, non perdimos detalle de todo o que nos explicou o bombeiro “xefe”… estaba entregado!

Así pois, que hai que facer en caso de que haxa lume na escola?... Estar caladiños, facer máis caso que nunca aos profes e… tocar a porta!

Si, si… tocar a porta para comprobar si está quente ou fría. E no caso de que esté quente, saír agachados como si foramos os ananiños de Blancanieves.

Asemade, o bombeiro “xefe” explicounos cal é o número ao que hai que chamar en caso de emerxencia, o “112”.

Coas ideas claras, fixemos un pequeno simulacro para comprobar se comprenderamos todo o explicado durante a sesión.

Seguimos un a un todos os pasos: gardamos silenzo, tocamos a porta para comprobar si estaba quente ou fría, fixemos unha fila en orde, agachámonos como ananiños e fixémoslle máis caso que nunca ao profe… lección aprendida e todos sans e salvos!

Como agasallo polo excelente traballo realizado… carné de bombeiro para a casa!...

Pero aínda tocaba o máis interesante, xa que os bombeiros deixáronnos poñer os seus cascos de súper-heroes… como pesaban!

Xa durante o resto da semana, o cúmulo de experiencias que deixou esta visita, converteuse en inspiración de diversas actividades de ensinanza-aprendizaxe: torbeliños de ideas, historias disparatadas “de lume” e incendios de varios dos nosos compañeiros… E por suposto, os nosos debuxos nos que plasmamos a nosa visión sobre todo o aprendido acerca do mundo dos bombeiros… non lles faltan detalle!

Así que xa o sabedes, no caso de incendio…

• Permanece tranquilo e mantén a calma.
• Ao saír pecha portas e ventás.
• Sae do edificio andando, sen correr polas escaleiras.
• Se prende lume na tixola, ponlle enriba unha tapadeira, non lle votes auga.
• E se non podes avisar a ningún adulto, chama ao 112.

Un saúdo e non esquezades que... o noso blog se alimentará dos vosos comentarios!

UN MUNDO DE MARABILLAS.

Non deixamos as nosas prácticas diarias e esta semana comezamos a traballar uns novos “Bits de Inteligencia”, nesta ocasión vencellados co mundo da arquitectura.

Os “Bits de Inteligencia”, resultan de gran utilidade para estimular o cerebro, a aprendizaxe e a memoria dos nenos e nenas, axudando a adquirir novos coñecementos, a desenvolver e ampliar a linguaxe, o hábito e a capacidade de atención, a memoria visual e auditiva, a fomentar a curiosidade e o interese... e xa o curso pasado convertíronse nuns recursos didácticos excepcionais cos que aprendemos, entre outras cousas: os planetas do Sistema Solar, descubrimos as características dalgúns animais e do conxunto instrumental escolar, tamén algunhas obras pictóricas de artistas archi-coñecidos...

Con esta rutina, descubrimos construcións arquitectónicas representativas do mundo que se atopan en lugares tan dispares tales como China, París, México ou na mesma India, axudando deste xeito a contribuir ao desenvolvemento da competencia no coñecemento e interacción co mundo físico establecida pola UNESCO.

Esta nova rutina, supón coñecer, comprender, apreciar e valorar criticamente diferentes manifestacións culturais e artítisticas que promoven un xuízo crítico e creativo da realidade que se amosa. Ademais, día a día, aprenderemos un pouquiño máis de cada construción arquitectónica: lugar no que se atopa, características máis salientables... e todo aquilo que nos amose un coñecemento o máis exhaustivo posible das 7 construcións seleccionadas. Non se nos escapa unha!!!

- TAJ MAHAL -

- TORRE EIFFEL -

- MUSEO GUGGENHEIM -

- PIRÁMIDE DE KUKULKÁN -

- LA ALHAMBRA -

 Un saúdo e non esquezades que... o noso blog se alimentará dos vosos comentarios!

UNHA SEREÍÑA OLÍMPICA.

Sabedes que antes das vacacións celebramos no cole a Semana da Prensa?... Pois si, e no noso cole esta actividade conmemorativa recollida no calendario escolar non pasou desapercibida, organizándose distintas actividades nas que redescubrimos aspectos vencellados con este medio de comunicación social.

Así pois, está a piques de publicarse no cole un novo número do xornal “Voces Rianxeiras”…

Tendo en conta todas as clases do cole, decidiuse organizar o traballo por seccións: deportes, cultura, sociedade, pasatempos… No noso caso, este curso tocounos a sección de deportes, unha sección na que quen máis e quen menos xa é un pequeno-gran experto.

Así, nas asembleas matinais introducimos o xornal chegando a conclusións tales como que se trata “dunha revista que len os maiores, na que só aparecen letras e fotografías negras”... interesantes conclusións, non si?...

Asemade, nestas asembleas tamén fixemos unha pequena aproximación ao traballo cotiá das persoas que cada día elaboran os xornais e fan posible que dende primeiriña hora da mañá os maiores poidan coñecer as novas do día a día… os xornalistas!

Deste xeito, convertímonos nuns intrépidos xornalistas e todos e todas matinamos nunha nova de interese xeral sobre o mundo deportivo… A ver, a ver… que deportes coñecemos?... Fútbol, baloncesto, tennis, carreiras de coches e de cabalos, golf… e ata o baseball,… menuda, case nada!

Xa centrando máis a atención no cometido que tiñamos que elaborar a modo de achega para o xornal do cole, decidimos descubrir e coñecer un pouquiño a Mireia Belmonte… Como, que non sabedes quen é?...

Mireia Belmonte é nadadora profesional e participou nos Xogos Olímpicos de Pekín 2008 e Londres 2012. É campiona mundial, europea e dobre subcampiona olímpica.

Antes de elaborar a nova para o xornal, vimos vídeos de Mireia Belmonte no ordenador nadando, competindo e entrenando moooi duramente para poder gañar as carreiras de natación nas que participa.

A partir desta actividade, fixemos un torbeliño de ideas no que escribimos palabras vencelladas con esta fantástica sereíña olímpica, con palabras tales como: “MEDALLA”, “PISCINA”, "CAMPIONA", “CARREIRA”, “BARCELONA”… rexistrando todos estes datos nun pequeno mural no que ademais pegamos 3 fotografías de Mireia Belmonte.

Por outra banda, e como premio a un comportamento e traballo cotiá extra-xenial, debuxamos nun folio de cor azul a Mireia, naquela situación que máis nos impactou a cada un de nós: Mireia nadadora, Mireia coa medalla e coa copa de gañadora, Mireia na piscina co traxe de baño… e ata Mireia coa bandeira de España…

E por suposto, co gorro e as gafas da sorte do profe, nadamos en estilos variados pola clase, ata simulamos tirarnos de cabeza nunha piscina imaxinaria como uns auténticos campións olímpicos… divertidíiisimo!

Con esta entrada e esta nova para o xornal do cole, tentamos rendir unha homenaxe a todos aqueles nenos, e non tan nenos, que cada día se erguen cedo, moooi cedo para entrenar no seu clube e meterse nunha piscina, a todas aquelas persoas que sacrifican pequenas-grandes cousas do seu día a día polo apaixoante mundo do deporte de competición… e non esquezades nunca… “o posible conséguese, e o imposible inténtase sempre!”

FELICIDADES MIREIA!

Un saúdo e non esquezades que... o noso blog se alimentará dos vosos comentarios!

UNHA OLLADA AO PASADO...

Coas actividades que levamos a cabo esta semana, pechamos o 2º trimestre, un trimestre repleto de experiencias e situacións que contribúen ao noso desenvolvemento integral, axudándonos a comprender un poquiño máis o noso pequeno-gran mundo.

Abofé que este trimestre foron moitas e variadas as actividades que levamos a cabo co gallo das actividades conmemorativas e complementarias que se organizaron no noso cole… non paramos!

Comezamos o trimestre celebrando o “Día da Paz”, unha semana na que máis que nunca se facía necesario portarse requete-ben, falar baixiño e non a berros,  escoitando ao resto de compañeiros e compañeiras, compartir… aprendendo que a PAZ é algo máis que a ausencia de guerra.

E do antroido?... Que nos dicides do antroido?... uns días cheos de fantasía nos que deixamos voar a nosa imaxinación aproveitando para convertirnos nos nosos personaxes favoritos. Un curso máis, houbo disfraces para todos os gustos: princesas, súper-heroes, fadas... extra-xeniais!

Asemade, tamén reservamos un anaquiño de tempo para sentir bolboretas no estómago de xeito especial o 14 de febreiro, “Día de San Valentín”. Uns días nos que traballamos iso tan complexo, e que tantos quebradeiros de cabeza trae aos maiores... o AMOR! Descubrindo estupefactos as incipientes historias de amor que, a pesar da nosa curta idade, máis dun xa viveu.

Ademais de todas estas actividades que dalgún xeito mudaron o normal desenvolvemento do trimestre, seguimos construíndo as nosas propias aprendizaxes e coñecementos que, un trimestre máis, recompilamos nos archivadores a modo de actividades impresas...

Así, entre outras, coñecimos o número 5 e 6: trazado, cantidade, serie numérica, composición e descomposición... a algún de nós aínda se nos resisten as mates, pero pacieeencia, que seguiremos o vindeiro trimestre...

Tamén comezamos a construír as nosas primeiras palabras e textos significativos silabeando a partir de distintos exercicios de prelectura os fonemas: /N/ e /Ñ/, /B/ e /V/, /D/, /F/, /R/...

E mil millóns de actividades máis como a lectura e traballo de contos que nos serviron como alicerce para as actividades desenvoltas: Rosa Caramelo (Edit. Kalandraka), Caracol e Caracola (Edit. OQO), a Colección ¿Quién es Tento? (Edit. Edelvives)..., exposicións na biblioteca do cole que nos achegaron ao ciclo vital dos vermes de seda e aos tesouros que se agochan no fondo mariño, sesións de contacontos...

Deste xeito, e tras todo o traballo desenvolto, chegan estes días de descanso que agardamos disfrutar o máximo posible para recargar as pilas e enfrontarnos con éxito ás diferentes actividades que nos agardan xa no 3º trimestre, un trimestre no que nos convertiremos... nos súper-maiores de mandilón!... como pasa o tempo!... 

Un saúdo e non esquezades que... o noso blog se alimentará dos vosos comentarios!

LINDA Á ESPREITA.

Esta semana, resultou máis diferente que de costume, pois si ben o mércores tivemos unha sesión de contacontos, o venres acudimos a unha exposición na biblioteca do cole sobre o noso mar... Comezaremos polo principio...

Mergullados de cheo nas derradeiras actividades coas que pecharemos xa este 2º trimestre o venres da vindeira semana, entre actividade e actividade, acudimos o mércores, despois do recreo á aula de psicomotricidade. Nesta ocasión, aínda que todos e todas levabamos vestida a roupa apropiada para psicomotricidade, en tanto que tiveramos clase “de gimnasia” a primeirísima hora da mañá, acudimos a esta dependencia por unha razón ben diferente... iamos a escoitar un contacontos... si, si, un contacontos de verdade!

Linda á espreita (Edit. Xerais), narra a historia dunha vaca diferente ás demais. Cada mañá, mentres a muxían, a vaca Linda fitaba nerviosa e impaciente cara ao exterior da granxa porque había algo que a Linda lle gustaba máis ca nada no mundo. O seu maior pracer consistía en meterlle un susto ao carteiro e escorrentalo...

O contacontos, cun libro grande, moooi grande, conseguiu crear un ambiente de expectación total no que non perdemos o máis mínimo detalle da historia de Linda, unha vaca entrañable, divertida e xoguetona.

Xa na clase, a mirada amable de Linda, non podía pasar desapercida entre as nosas actividades, e xurdiu a proposta de facer un debuxo do conto, no que cada quen plasmou aquilo que máis lle chamou á atención aparecendo nun lugar privilexiado a súa protagonista: a vaca Linda.

Ao longo deste trimestre, foron moitos os contos lidos e traballados na clase, dando boa conta deles en varias entradas do noso blogue, pois a súa utilización serviunos para crear un clima de diversión e festa que resulta tan grato e estimulador para a aprendizaxe.

Máis concretamente, coa narración de contos aprendemos a escoitar, a pensar, a ver as cousas cos ollos da imaxinación, permitíndonos entrar na realidade por camiños novos e coñecer e comprender progresivamente o noso pequeno-gran mundo, que non é tan doado como pensades os maiores.

Todo isto ademais, traballámolo na actividade do préstamo semanal na que cada semana un dos nosos compañeiros e compañeiras convírtese nun contacontos que, cun ton de voz máis ou menos alto, achéganos á historia que se recolle no conto escollido para a ocasión.

Do mesmo xeito, a lectura de contos na nosa aula, convértese nun excelente momento de relaxación co que, tras o momento de xogo libre no patio ou nos rincóns, distendemos a atmósfera da aula.

Por outra banda, e xa o venres, acudimos a última hora á biblioteca do cole para levar a cabo a actividade do préstamo semanal e realizar a lectura en voz alta e en gran grupo das láminas que levamos esta semana: o N e o Ñ.

Pero nesta ocasión, tan pronto entrar na biblioteca, 5 carteis mudaron o desenvolvemento normal da actividade…

Tratábase da exposición “Coidando o noso mar” do CEIDA (Centro de Extensión Universitaria e Divulgación Ambiental de Galicia) coa que se pretende sensibilizar sobre o importante valor  natural e a fraxilidade dos ecosistemas mariños, tendo en conta a incidencia das actividades humanas e os residuos que estas xeran. 

Para saber máis, facer click na imaxe da barra da esquerda.

Coa simple observación das fotografías que aparecían nos carteis, quen máis e quen menos fixo a súa pequena achega acerca do necesario que resulta que todos e todas coidemos o noso mar para poder desfrutar del cando cheguen as vacacións de verán.

Esta exposición, serviu como complemento perfecto a unha sesión do proxecto de divulgación e formación que a Cofradía de Pescadores de Rianxo está levando a cabo e na que participamos fai xa algunhas semanas.

Tratábase de descubrir e identificar, mediante o tacto, distintos obxectos e/ou produtos que teñen orixe mariña. E claro, como podedes imaxinar, entre estes obxectos apareceron elementos de orixe humana… pésimo!

E como premio a esta semana tan intensa no que a actividade se refire…, que mellor maneira que pechar o trimestre que levando os contos de prelectura que nos trouxo a SS.MM. o Rei Gaspar?... Algúns xa lemos sen axuda… bueno, unha pouquiña si que precisamos,... a do dediño lector!… xa o coñecedes?...

Un saúdo e non esquezades que... o noso blog se alimentará dos vosos comentarios!