Bienvenido

É TEMPO DE VERÁN!...

lunes, 1 de julio de 2019


Tras unha andadura chea de vivencias, experiencias, descubrimentos e aprendizaxes, chega o final do curso co inicio do verán... é tempo de VERÁN!
O verán é un período vacacional, e resulta importante gozar del como tal; nembargantes, as familias debedes ter en conta que calquera xogo ou actividade cotiá pode adquirir certo trasfondo pedagóxico.
Por iso, ademais de xogar, ir á praia, ao parque, de viaxe visitar novos lugares... é importante, sempre que sexa posible, realizar tarefas que sirvan de medio para consolidar algunhas das capacidades adquiridas ao longo do curso. Non se trata de facer fichas como as da escola, senón de non perder o hábito e a actitude de traballo.
Dende un enfoque lúdico, poderemos desenvolver distintas actividades, non como unha obriga, senón como unha rutina que levamos a cabo día a día durante as nosas tan merecidas vacacións.
Neste senso, resulta importante destacar respeto á lecto-escritura, que un lector non nace, faise, para iso, as familias debedes transmitirnos o valor da lectura como unha fonte de aproximación a novos coñecementos e como unha porta aberta ao mundo da fantasía.
Destacar o importante que resulta que non nos iniciedes no proceso lector, xa que moitas veces, inconscientemente, xerádesnos frustracións e angustias innecesarias cara unha aprendizaxe custosa á que lle prestaremos especial atención o vindeiro curso, paciencia...
Entre outras das posibles actividades que podemos levar a cabo durante estas vacacións, primando sempre o periodo vacacional e de descanso, estarían:
  • identificación e trazado de grafemas. Non nos poñades letras para copiar,... iso está chupao! agora xa somos maiores e deberiamos saber trazar as letras seguindo o ditado de grafemas... facemos a proba?
  • recoñecemento, e moi especialmente trazado de números significativos, a algún todavía se nos resiste a identificación e grafía dalgúns números... coa vosa axuda o lograremos!,
  • seguir traballando as cores, os trazos e as formas planas, aprendendo a identificalas en elementos do contorno cotiá,
  • tampouco deberemos esquecernos da expresión plástica, así que deixade que nos expresemos artisticamente e de xeito libre,... sen modelos! Non esquezades que é máis importante o proceso que o produto, xa que este dependerá do noso grao madurativo e da nosa particular visión do mundo.
Todo isto, por suposto, sen esquecer de gozar as tan merecidas vacacións que acabamos de comezar, aproveitando estes meses para recargar as pilas para todos os retos e actividades que nos agardan a partir de setembro...

OS NENOS E NENAS DE 4 ANOS A,
DESÉXANVOS UNHAS MOI FELICES VACACIÓNS DE VERÁN!!


ARDE LVCVS MMXIX.

viernes, 14 de junio de 2019

Ilusionados, antes de pechar o curso, reservamos uns días para traballar unha das celebracións organizadas cada mes de xuño na nosa cidade, siii... o Arde Lvcvs MMXIX xa está aquí!
O Arde Lvcvs comezou a súa andadura no ano MMII ligado ao solsticio de verán cun obxectivo primordial: rememorar a fundación da nosa cidade recreando o seu pasado romano.
Así pois, hai uns días, o casco histórico comezou a transformarse en Lvcvs Augusti, destacada urbe da Gallaecia romana, para ofrecer do 14 ao 16 de xuño un completo programa de actividades.
Neste senso, cunha motivación extra pois quen máis e quen menos xa viviu o Arde Lvcvs de anteriores edicións, e coa axuda do Encerado Dixital Interactivo (E.D.I.), revivimos algúns dos actos máis emblemáticos desta celebración como o pasarrúas a cargo das 17 asociacións de recreación histórica pola Ronda da Muralla... que vestimentas!
Falamos de tropas romanas, tribos castrexas, dos tambores e bandeiras..., descubrindo como as indumentarias da cultura romana e castrexa serán o eixo principal, aprendemos a que no Arde Lvcvs non nos “disfrazamos de...”, senón que nos vestimos, caracterizamos... é outro nivel!
Axiña, recreamos a vestimenta que luciriamos no pasarrúas do venres nun folio no que aparecía en números romanos o ano actual: MMXIX... que doado!


Neste senso, un curso máis o que nos resultou especialmente interesante foi o relacionado co combate e coa loita: identificamos armas propias da época e todo aquilo que poidades imaxinar para facer... guerra!
Sen lugar a dúbidas, a nosa cidade converterase no esceario perfecto para revivir o noso pasado a través dos personaxes da época como os druidas, guerreiros, lexionarios, patricios, sacerdotisas, escravos, emperadores...
Para rematar, e como colofón final ao traballo desenvolto, hoxe venres participamos activamente no  pasarrúas organizado ata a Praza de España que inaugura oficialmente o Arde Lvcvs MMXIX.
Con e sen capa, armadura, bolso, coroa de flores... menuda tropa romana e tribo castrexa!



Agarrados da parella establecida, cadaquén gozou do pasarrúas á súa maneira. Ilusionados, percorremos parte da Avda. de Ramón Ferreiro, Bispo Aguirre, Praza de España... canta xente!... cantas fotos!... respirábase ambiente de festa!...


Este curso si que fomos ao xeito, sen carreiras nin sobresaltos inesperados... fantástico!
Agora xa, esta fin de semana queda gozar do pasado de Lvcvs Avgvsti máis vivo ca nunca... que non se apague o lume!... que viva o Arde Lvcvs!...


Un saúdo e non esquezades que... o noso blogue se alimentará dos vosos comentarios!

A VIAXE DE MUNELA.

viernes, 7 de junio de 2019

“La superbici de Munela es alucinante...”; deste xeito comezaba a historia coa que ilusionados despedimos a MUNELA.
“A viaxe de Munela”, serviunos como fío condutor para pechar as actividades desenvoltas ao longo deste curso coñecendo, identificando e valorando elementos representativos dos bosques.
Axiña descubrimos que os bosques son lugares especiais para gozar do tempo libre, para descansar e mesmo para perderse coma MUNELA.
Así pois, nos bosques hai plantas, cogomelos, flores, animais...
Algunhas ÁRBORES perden as follas en outono, mentres que outras as manteñen todo o ano.
Nos bosques viven moitos ANIMAIS diferentes: caracois, paporrubios, osos, cabalos do demo -libélulas-, lagartos, escaravellos, coellos, esquíos, xabaríns... que buscan RECUNCHOS para ter as súas crías e vivir tranquilos: niños, colmeas, tobos, formigueiros, toupeiras... Así e todo, moitos animais do bosque so poden verse de noite coma os mouchos, vagalumes e morcegos.
Tamén aprendemos algúns dos PRODUTOS que nos da o bosque. Froitos coma os amorodos, framboesas e grosellas, tamén madeira para fabricar mobles, portas, caixas..., cortiza, cogomelos de diversos tipos...
E claro, para que todo esté en perfectas condicións, precisamos das PERSOAS que coidan o bosque. Neste senso, centrámonos nas figuras do bombeiro e axente forestal, facendo fincapé en que nós mesmos podemos e debemos axudar a coidar os bosques.
Como podedes imaxinar, estas aprendizaxes quedaron refletidas nuns debuxos realizados cada vez con máis esmero e adicación aos que non lles falta detalle: árbores e plantacións variadas, toupeiras e madrigueiras, mesmo hai quen se atreveu a debuxar un tractor e unha desbrozadora... case nada!


Por outra banda, e como complemento a este centro de interese, estas semanas pechamos a actividade da horta escolar que desenvolvemos dende o 2º trimestre. Nesta ocasión, organizados en 2 grupos, adicamos varias xornadas a revisar a plantación e coidar que todo estivese a punto para a recollida da colleita que, se o tempo o permite, levaremos a cabo o 19 de xuño.
Ao tempo, nestes días nos que o traballo que restaba está practicamente rematado, aproveitamos para colorear o libro do horto co que lembramos algunhas das especies vexetais que fomos plantando en cada sesión: cebolas, leitugas, repolos...


E para rematar esta semana, que mellor que revisar, clasificar e arquivar parte das actividades impresas que dende principio de curso fomos elaborando sen decatarnos de todo o que traballamos. Moitos non nos acordabamos dalgunhas actividades emblemáticas que causaron expectación como o Halloween-Samaín ou o Nadal... canta purpurina concentrada!


Agora xa, toca ilusionarse coa chegada inminente do Arde Lvcvs MMXIX co que gozaremos dun pasado máis vivo ca nunca... romanos e castrexos!... preparados?...


Un saúdo e non esquezades que... o noso blogue se alimentará dos vosos comentarios!

"PÍCAROS NO MERCADO".

viernes, 31 de mayo de 2019


Dende a Área de Concello e Cidadanía de Lugo, esta semana participamos na campaña “Pícaros no mercado”; unha actividade coa que nos achegamos de xeito vivenciado ao Mercado Municipal e á Praza de Abastos.
Neste senso, esta temática non é nova para nós, pois no libro de actividades nº5 de MUNELA, cuxo centro de interese era o mercado, descubrimos, identificamos e valoramos o mercado como un espazo no que podemos encontrar todo tipo de produtos frescos con cores, olores e sabores moi variados.
Así, aprendemos que no mercado a xente compra verduras, carne, pan... e mesmo toma chocolate con churros a 5 euros como PABLO, BERTA e MUNELA... que memoria!
A primeira hora da mañá, expectantes e ilusionados, repasamos as normas de seguridade e de urbanidade para a saída: agarrados da nosa parella, non andar moi rápido nin moi despacio, non baixar da beirarrúa...
Aproveitando que o tempo acompañaba, percorremos a Avda. de Ramón Ferreiro, Bispo Aguirre, Praza de España, Doutor Castro... 


Que vida hai de boa mañá en Lugo, que bonito é Lugo, Lugo ten moito que ver... Lugo mola!
Xa logo, en primeiro lugar, visitamos a Praza de Abastos, mergullándonos de cheo en cada posto.


Na PESCADERÍA vendían pescados de mar e de río. Tamén marisco: langostas, centolos e peixes a granel!


Neste posto había un conxelador xigante que semellaba un armario... impresionante!


Na POLLERÍA vendían polos, pavos, ovos... mesmo hamburguesas e croquetas... excelente selección!


No posto da FROITERÍA había leitugas, tomates, patacas, cogomelos..., e moitas moitísimas clases de froitas: mazás, cereixas, plátanos, melocotóns... canta cor, canto brillo!... cada produto no seu lugar!...


Na CARNICERÍA vendían carne de vaca, de porco e de cordeiro... mesmo había porcos enteiros!... quedamos abraiados! e posiblemente sexa unha das cousas que máis nos chamaron a atención.


Xa para rematar a visita guiada pola Praza de Abastos, restaba visitar a PANADERÍA onde vendían distintos tipos de pan, galletas, rosquillas, pasteis, empanadas... mmm, canto arrecendía!


Por outra banda, tamén visitamos o Mercado Municipal cos mesmos postos e unha CAFETERÍA xusto na entrada,... que almorzo tan apetecible!...



Neste espazo, desenvolvemos unha actividade coa que recoñecer e valorar a importancia dunha dieta equilibrada como medida fortalecedora de saúde coloreando segundo o código de cor establecido os alimentos prexudiciais (cor vermella) e beneficiosos (cor verde).


Sorprendente o involucrados que estivemos na actividade, coidando de non saírnos do contorno e obstinándonos en rematar a actividade cando xa apenas restaba tempo... debiamos voltar ao cole!..., o seguinte grupo estaba agardando a súa quenda de visita!...


Para rematar, na clase, improvisamos unha asemblea na que cadaquén aportou a súa impresión e valoración, recreando tanto o noso posto favorito como as rúas de Lugo... os gladiadores romanos da Praza de España: un clásico... estupendo!



Un saúdo e non esquezades que... o noso blogue se alimentará dos vosos comentarios!